लियोनल मेसीको कप्तानीमा रहेको अर्जेन्टिनाले करिब डेढ वर्षअघि कतारमा विश्वकप फूटबलको उपाधि जित्यो । तर सो प्रतियोगितामा अर्जेन्टिनाका प्रमुख स्ट्राइकर लाउटारो मार्टिनज भने ‘फ्लप’ भए ।

साउदी अरेबिया र मेक्सिकोसँगका खेलमा अवसर गुमाएपछि उनले त्यसपछिका हरेक खेलमा शुरूवाती ११ मा अवसर पाएनन् । प्रतिस्थापन खेलाडीको रुपमा मैदानमा आउँदा पनि उनले लगभग शतप्रतिशत गोलका अवसर गुमाए ।

अर्जेन्टिनाले विश्वकप जित्दा पनि मार्टिनेज गोल र एसिस्टविहीन रहे ।

त्यसयता उनले क्लब स्तरमा एकपछि अर्को गोल गरे । तर झण्डै डेढ वर्ष उनले अर्जेन्टिनाका लागि गोल गर्न सकेका थिएनन् । 

यद्यपि, बुधवार भने मार्टिनेजले अन्तर्राष्ट्रिय मैत्रीपूर्ण खेलमा कोस्टारिकाविरुद्ध गोल गर्न सफल भएका छन् । उनले खेलको ७७ औँ मिनेटमा गोल गरेपछि अर्जेन्टिनाले खेल ३–१ ले जित्यो ।

यसअघि मार्टिनेजले झण्डै डेढ वर्षअघि अर्थात् सेम्टेम्बर २०२२ मा होन्डुरसविरुद्ध भएको मैत्रीपूर्ण मार्टिनेजले गोल गरेका थिए । विश्वकपको तयारीस्वरुप खेलिएको सो खेल अर्जेन्टिनाले ३–० ले जितेको थियो । त्यसयता मार्टिनेजबाट गोल हुन सकेको थिएन । यसले गर्दा उनी निराश देखिन्थे ।

मेसीबिना अर्जेन्टिनाको अर्को जीत