काठमाडौं – काठमाडौं महानगरपालिकाले धूलो सफा गर्ने मेसिन ब्रूमर दिनदिनै सञ्चालन गर्छ । तर  महानगर क्षेत्रमा धूलोको समस्या कम हुन सकेको छैन ।

महानगरले काठमाडौं उपत्यकामा गत चैत १२ गतेदेखि ब्रूमर चलाउन थालेको हो ।

ब्रूमर राति ८ बजेदेखि बिहान ४ बजेसम्म ८ घण्टा चलाउने गरिन्छ । ५ जना चालक, ५ जना सहयोगी, ५ जना महानगरका सुरक्षाकर्मी र ५ जना अनुगमनकर्तासँगै दैनिक २० जना कर्मचारी ब्रूमरका पछाडि खटिने गरेको काठमाडौं महानगरपालिकाको वातावरण विभाग प्रमुख हरिकुमार श्रेष्ठले लोकान्तरलाई बताए ।

५ वटा ब्रूमरले दैनिक लगभग १८ टन धूलो संकलन गर्ने गरेको महानगरको दाबी छ । संकलन गरेको धूलो टेकुको फोहोर संकलन केन्द्रमा लगेर फाल्ने गरेको महानगरका इन्जिनियर पुरुषत्तोम शाक्यले बताए । त्रिपुरेश्वर–नारायण गोपाल चोक, त्रिपुरेश्वर–वानेश्वर–एयरपोर्ट, त्रिपुरेश्वर–कालिमाटी लगायतका क्षेत्रमा ब्रूमर चलिरहेको शाक्यले बताए ।

महानगरपालिकाले करीब ११ करोड खर्च गरेर ब्रूमर खरिद गरेको थियो । ब्रूमरले काम शुरू गरिसकेपछि काठमाडौं धूलो मुक्त हुने जिकिर महानगरपालिकाले गरेको थियो । 

तर ब्रूमर भित्रिएको महिनादिन बितिसक्दा पनि काठमाडौंमा धूलो कम हुन सकेको छैन । घर तथा भवन निर्माण गर्दा बाटोमै राखिने गिट्टी–बालुवाले सडकमा धूलो बढी देखिएको छ ।

कमलपोखरीको सिटी सेन्टरदेखि पुतलीसडकको स्टार मलसम्म आउने सडक ओरालोमा ग्राभेल सडकले गर्दा सडक क्षेत्रमा धूलो ल्याएको देख्न सकिन्छ । काठमाडौं महानगरपालिका कार्यालय अगाडि सडकसँग जोडिएको सैनिक

गेटको सडकमा कच्ची माटो छ, त्यहाँबाट आउने–जाने सवारीसाधनले मुख्य सडकमा माटो ल्याउने काम गर्छन्, जसले गर्दा सडकमा धूलो आइरहेको छ ।

सुन्धारा क्षेत्रको फुटपाथमा पनि धूलो उस्तै छ । फुटपाथ निर्माणको काम करीब सकिएको छ तर सडकमा जमा भएका माटोको थुप्रो भने उठाइएको छैन । जसका कारण पूरै फुटपाथदेखि सडकसम्म धूलो आएको स्थानीय व्यापारी श्याम तामाङले बताए ।

महानगरपालिका कार्यालयकै अगाडि सिभिल होम्सले निर्माण गरेको भवनको काम सडक क्षेत्रलाई समेत अवरोध गर्ने गरी भइरहेको छ । 

नगरवासीले सडकमा फाल्ने धूलोयुक्त फोहोर पनि धूलोको अर्काे स्रोत रहेको जानकारहरू बताउँछन् । नगरवासीले कतिपय सडकको छेउछाउमा डम्पिङ साइडजस्तै फोहोर थुपार्ने गरेका छन् । सडकबाटै फोहोर उठाउने निकायले दैनिक फोहोर उठाएर लिएर गएपनि धूलो त्यहीँ छाडेर जाने गरेको छ ।