काठमाडौं – लोकसभा चुनावपछिको एक्जिट पोलमा प्रधानमन्त्री नरेन्द्र मोदी सत्तामा फर्किने अनुमान आएपछि चीन खुशी भएको छ । 

चाइनिज एसोसिएसन फर साउथ एसियन स्टडीजका अनुसन्धानकर्ता कियान फेङले चिनियाँ सरकारको मुखपत्र ग्लोबल टाइम्ससँगको कुराकानीमा बताए, ‘मोदीले जिते भने चीन र भारतको सम्बन्ध सकारात्मक दिशामा अघि बढ्छ । त्यसैले पनि चीन मोदी नै सत्तामा फर्कून् भन्ने चाहन्छ ।’

कियानले भने, ‘मोदी चुनाव नजितेर कांग्रेस सत्तामा आयो भने पनि चीनसँग भारतको सम्बन्धमा असर पर्दैन । चीनसँग सुुसम्बन्ध कायम राख्नु भारतको राष्ट्रिय हितमा छ । चुनावमा मतदाताहरूलाई फकाउनका लागि भारतीय नेताहरूले चीनमाथि आक्रामक र नकारात्मक बयान दिएको भए पनि सत्तामा आएपछि ती शब्दहरूको कुनै महत्त्व रहने छैन । सत्ता चलाउन थाल्नेबित्तिकै उनीहरू राष्ट्रिय हित हुने निर्णय लिन थाल्छन् ।’

त्यसो त सबैजसो चिनियाँ खबरले मोदीको जीतकै सम्भावना देखाएका छन् । ग्लोबल टाइम्सले मोदीको जीत भएमा उनले राष्ट्रिय हितलाई ध्यानमा राखेर चाइना कार्ड खेल्न बन्द गर्ने लेख्यो । भारत र चीनबीचको सुमधुर सम्बन्ध पश्चिमी मुलुकहरूले देख्न नचाहेको अखबारको दाबी छ ।

एजेन्सी