एजेन्सी- लोकसभा चुनावमा लज्जास्पद हारपछि भारतीय राष्ट्रिय कंग्रेसमा राजीनामाको शिलशिला शुरू भएको छ । 

उत्तर प्रदेश, ओडिशा र कर्नाटकका तीन शीर्ष कंग्रेस नेताले पार्टी अध्यक्ष राहुल गान्धीलाई आफ्नो राजीनामा पठाएका छन् । 

उत्तर प्रदेशको कुल ८० सिटमा कंग्रेसले केवल रायबरेलीमा मात्र जीत हासिल गर्न सक्यो । राहुल गान्धीले समेत अमेठीको सिट बचाउन सकेनन् । 

हारपछि उत्तर प्रदेशका पार्टी अध्यक्ष राज बब्बरले आफ्नो पदबाट राजीनामा दिएका छन् । 

राज बब्बर आफैं पनि फतेपुर सिकरीबाट चुनावी मैदानमा थिए तर उनले भाजपाका प्रत्याशीसँग लगभग पाँच लाख मतको हार बेहोरे । 

बब्बरले ट्वीट गर्दै प्रदेशको हारको जिम्मेवारी लिँदै राजीनामा दिएका छन् । 

कर्नाटक राज्यको चुनावी अभियानमा कंग्रेसको नेतृत्व गरेका एचके पाटिलले पनि राजीनामा सुम्पिएका छन् । २८ सिट भएको कर्नाटकमा कंग्रेसले जम्मा एक स्थानमा जीत हासिल गरेको छ । जबकी दक्षिणका अन्य प्रदेशमा राज्यले निक्कै राम्रो प्रदर्शन गरेको छ । 

यस्तै ओडिशा प्रदेशका कंग्रेस प्रमुख निरन्जन पटनायकले पनि राजीनामा दिएका छन् । ओडिशामा कांग्रेसले जम्मा नौं विधानसभा सिट र एक लोकसभा सिटमा जीत प्राप्त गरेको छ । पटनायक आफैं दुई विधानसभा सिटमा लडेकोमा दुवैबाट हारे ।