काठमाडौं – दशैंतिहारको सुरक्षालाई मध्यनजर गर्दै महानगरीय परिसर काठमाडौंले १४ वटा क्षेत्रमा विभाजन गरेर सुरक्षा दिने योजना बनाएको छ ।

६७ स्थानमा स्थायी र ५६ स्थानमा अस्थायी पकेट बनाई साइकल गस्तीमा ३५ टोली, मोटरसाइकलमा ८३ टोली, सीआरभी गाडी ५६ र ४८ मोबाइल गाडीमा गस्ती गरिने प्रहरी परिसरका प्रमुख प्रहरी वरिष्ठ उपरीक्षक (एसएसपी) उत्तमराज सुवेदीले बताए ।

एसएसपी सुवेदीले लोकान्तरसँग भने, ‘हामीले सूचना संकलनको लागि सादा पोशाकमा ७० जना खटाएका छौं । सिल सर्चका लागि ३० जना, कर्डन सर्चका लागि ३० जना र एम्बुसिङ र निगरानीका लागि ३० जना खटाएका छौं ।’

काठमाडौं विभिन्न नाकामा चेकजाँचको लागि ७ वटा कुकुरसहित टोली परिसरले खटाएको छ । हतियार सहितका मोटरसाइकलमा ५३ वटा टोली खटाएको प्रमुख सुवेदीले बताए ।

सर्वसाधारणलाई कलंकी, बल्खु, सुन्धारा, पुरानो बसपार्क, गोंगबु, नयाँ बसपार्क, तिलगंगा, चाबहिल, कोटेश्वर, बालाजु चोक, माछापोखरी चोक, जोरपाटी लगायत १४ ठाउँमा टिकट काट्नको लागि व्यवस्था गरिएको प्रहरीले जनाएको छ ।

दशैंमा घर छोडेर जाँदा घर तोडफोड हुन सक्ने, घरभित्र रहेका सम्पत्ति चोरी हुन सक्ने भएकाले घर छोडेर जाँदा प्रहरीलाई खबर गर्न महानगरीय प्रहरी परिसर काठमाडौंले अनुरोध गरेको प्रमुख सुवेदीले बताए ।