ब्राजिलको साओ पाउलोस्थित फर्नाओ दियास हाईवेमा बाइकमा गइरहेका एक व्यक्तिलाई डाँकाहरूले गोली हानेपछि उनीहरूबाट बच्नका लागि भागेको रोमाञ्चक भिडियो प्रकाशित भएको छ । 

एडुआर्डो पिमेन्ता नामक व्यक्ति अघिल्लो आइतवार आफ्नो बाइकमा गइरहेको बेलामा अर्को मोटरसाइकलमा आएका मानिसहरूले उनलाई लखेटेका थिए । 

डाँकाहरूले गोली चलाएपछि उनले बाइक पूरै घुमाएर सडकको गलत साइडबाट बाइक हुइँक्याएका थिए र त्यसक्रममा ट्रक र कारहरूसँग लगभग ठोकिएका थिए । 

उनले ग्लोबो जी१ सँग कुरा गर्दै भने, ‘म रोकिएको भए मर्ने थिएँ । उनीहरूले गोली हाने अनि त्यसपछि म कसरी बाँच्ने भन्ने कुरा मात्र रह्यो ।’

पिमेन्ताको हेल्मेट क्यामरामा रेकर्ड गरिएको भिडियो फूटेजमा उनी शुरूमा शान्त तवरले सडकमा बाइक गुडाइरहेको देखिन्छ । 

तर केही समयपछि अर्को बाइकमा दुईजना पुरुष आइरहेका देखिन्छन् । 

त्यसपछि बाइक हाँकिरहेका मानिसले पिमेन्तालाई संकेत गरेर बाइकलाई देब्रे कुनाबाट मध्यमा ल्याउँछन् र बाटो रोक्न खोज्छन् । 

पिमेन्ताले बाइकको गति घटाइरहेका हुन्छन् । त्यसपछि उनी पछिल्तिर हेर्छन् र फर्केर सडकको गलत मोडतिर बाइक कुदाउँछन् । 

उनी ब्यारियर नजिकै बाइक कुदाउँछन् र कार तथा ट्रकहरूलाई छल्दै भागिरहन्छन् । 

यस अवधिभरि उनी बाइकलाई नियन्त्रणमै राख्छन् र केही मिनेटपछि सही दिशामा गइरहेको ट्राफिक समात्छन् ।

यस रोमाञ्चक यात्राका क्रममा पिमेन्ताले कुनै कुनै समय १५० किलोमिटर प्रतिघन्टाको गतिमा दौडिन्छन् र उल्टो बाटो लगभग दुई किलोमिटर गुड्छन् । 

आफूहरूमाथि हुन लागेको डकैतीका बारेमा प्रहरीलाई खबर गर्न खोजेको भए पनि उनले अन्लाइनमा लगइन गर्न सक्दैनन् । 

साओ पाउलो सचिवले उजुरी नआइकन घटनाको अनुसन्धान गर्न नसकिने बताएको ग्लोबोले लेखेको छ ।