बुटवलस्थित लुम्बिनी प्रादेशिक अस्पतालमा कार्यरत ५ जना चिकित्सकलाई सेवाबाट हटाइएको छ ।

देशमा कोरोना भाइरसको महामारीको समयमा अस्पताललाई कुनै जानकारी नदिई अस्पतालमा नआउने ५ जना मेडिकल अफिसर सहितका चिकित्सकलाई अस्पतालले सेवाबाट हटाइदिएको हो । 

अस्पतालका मेडिकल सुपरिन्टेन्डन डा. राजेन्द्र खनालका अनुसार रेडियोलोजिस्ट मेडिकल अफिसरहरू डा. बरदान वली, डा. तारा शर्मा, डा. प्रकृति कार्की, नाक, कान, घाँटी रोग विशेषज्ञ डा. प्रकाश न्यौपाने, युरो सर्जन डा. सुभाषचन्द्र चौधरी सेवाबाट हटाइएको हो । 

अस्पतालमा कुनै जानकारी नदिई चौधरी चैत ९ गतेदेखि, वली, शर्मा र न्यौपाने चैत ११ गतेदेखि र कार्की चैत १२ गतेदेखि अस्पताल गएका थिएनन् । मेसु खनालले लोकान्तरसँग भने, ‘देशमा यस्तो महामारी छ । उहाँहरू केही जानकारी नदिई २ हप्तासम्म अस्पताल आउनुभएन । त्यस्ता चिकित्सकलाई राख्न पनि आवश्यक नदेखिएकाले हटाइएको हो ।’ 

खनालले थपे, ‘अस्पताल जस्तो अत्यावश्यक क्षेत्रमा जानकारी नदिई चिकित्सक घर बस्नै मिल्दैन त्यस्ता चिकित्सकलाई राख्न आवश्यक देखिएन ।’

प्रदेशको सामाजिक विकास मन्त्रालयको पहलमा डाक्टरहरूलाई कारवाही गरिएको हो । हटाइएका सबै करारमा कार्यरत चिकित्सक हुन् । उनीहरू करीब १ वर्ष अगाडिदेखि कार्यरत थिए । यहीँ चैत २० गतेदेखि लागू हुने गरी अस्पताल सेवाबाट हटाइएको छ ।

अस्पतालले रिक्त भएको स्थानमा नयाँ चिकित्सक नियुक्त गर्न सूचना प्रकाशित गरेको छ । ३० जना नयाँ चिकित्सकका लागि अस्पतालले आवेदन माग गरेको छ ।  ५ नम्बर प्रदेशकै सबैभन्दा ठूलो अस्पतालमा दैनिक १ हजार बिरामी उपचारको लागि आउने अस्पतालका प्रशासन विभागका नायव सुब्बा श्रीराम पाण्डेले जानकारी दिए । अहिले अस्पतालमा ७७ जना चिकित्सक कार्यरत छन् ।