काठमाडौं, १० वैशाख– हिजो (शनिबार) साँझ दुई चरणमा निर्वाचन गर्ने गरी मधेसी मोर्चासहितको संघीय गठवन्धनसँग ३ बुँदे ‘अलिखित’ सहमति गरेका प्रधानमन्त्री प्रचण्डले आज (आइतबार) बिहान निर्वाचन आयुक्तहरुसँग परामर्श लिएका छन् ।
खासगरी दुईचरणमा निर्वाचन गर्न सकिने अवस्था र दोस्रो चरणको निर्वाचनका अपयुक्त मितिका बारे प्रधानमन्त्रीले निर्वाचन आयुक्तहरुसँग परामर्श लिएका थिए ।
निर्वाचन आयोगका सबै आयुक्तहरुालई आइतबार बिहान बालुवाटार बोलाएर प्रधानमन्त्रीले दोस्रो चरणको निर्वाचनको मिति तय गर्नेबारे छलफल गरेका थिए । बैठकमा जेठको तेस्रो सातामा दोस्रो चरणको निर्वाचन गरे उपयुक्त हुने विषयमा छलपल भएको जनाइएको छ ।
निर्वाचन आयुक्तहरुसँगको छलफल पछि आजै बस्ने मन्त्रिपरिषदको बैठकले दोस्रो चरणको निर्वाचनबारे ठोस निर्णय गर्नेछ ।
