२२ असार २०८३, सोमबार
कोरोनाभाइरसको कहर जारी रहेको बेलामा यसलाई अन्त्य गर्न विभिन्न किसिमका औषधि र खोपहरूका परीक्षण भइरहेको छ ।
यसैबीच भारतको चेन्नईमा एक चिकित्सकले कोरोनाभाइरसको उपचारका लागि बनाएको औषधि आफैंमा परीक्षण गर्दा उनको मृत्यु भएको छ ।
पेरुगुंडीमा बस्ने शिवगनेसन एक आयुर्वेदिक उत्पादन कम्पनीका फार्मासिस्ट र प्रोडक्सन म्यानेजर हुन् । उक्त कम्पनीको कफ सिरप प्रसिद्ध छ ।
कोरोनाभाइरस निको पार्न शिवगनेसन र उनका हाकिम राजकुमारले एक औषधि खोज्ने कोशिश गरिरहेका थिए । राजकुमारले उक्त औषधिका केही थोपा पिए भने शिवगनेसनले अलि बढी नै पिए ।
त्यसपछि दुवैजना बेहोश भए । उनीहरूलाई तत्कालै नजिकैको अस्पताल लगियो । शिवगनेसनको मृत्यु अस्पतालमा भएको थियो भने राजकुमारको स्वास्थ्य गम्भीर भएको बताइएको छ ।
प्रहरीले घटनाको अनुसन्धान गरिरहेको छ ।
अहिलेसम्म कोरोनाभाइरसको खोप पत्ता लागिसकेको छैन ।
