गण्डकी प्रदेशमा एकैदिन ७७ जना कोरोना संक्रमित देखा परेका छन् । एक–दुई गनेर बिरामी डिस्चार्ज गरी ‘ग्रिन जोन’ घोषणा गरेको गण्डकीलाई यही लयमा संक्रमित देखा पर्दै गए व्यवस्थापनमा कठिन हुने देखिन्छ । 

गण्डकीका ११ जिल्लामध्ये मुस्ताङबाहेक सबै जिल्लामा कोरोना फैलिन गएको हो । बिहीबारमात्र हिमालपारीको जिल्ला मनाङमा कोरोना पुष्टि भएको हो । बिहीबारमात्रै ७७ जना नयाँ संक्रमित देखा परेका छन् । यो संख्या पछिल्लो २४ घण्टामा देखिएका संक्रमितमध्ये सबैभन्दा उच्च हो । योसँगै गण्डकीमा कुल संक्रमित ३ सय २४ पुगेको गण्डकी प्रदेश स्वास्थ्य निर्देशनालयले जनाएको छ । 

निर्देशनालयले बिहीबार जारी गरेको तेस्रो विज्ञप्तिअनुसार स्याङ्जा, पर्वत, तनहुँ, नवलपरासी (बर्दघाट सुस्ता पूर्व) र बागलुङमा गरी कुल ३० जनामा संक्रमण देखा परेको हो । उनीहरु सबैजना भारतबाट फर्किएको र सम्बन्धित पालिकाको क्वारेन्टाइनमा बस्दैआएको जनाइएको छ ।

स्याङ्जा आँधीखोला गाउँपालिकाका ७२ र ३४ वर्षीया महिलामा कोरोना संक्रमण देखिएको छ । सोही गाउँपालिकाका वर्ष १३ र १९ का पुरुषमा समेत कोरोना देखिएको हो । स्याङ्जाकै कालीगण्डकी गाउँपालिकाका ५ जना पुरुषमा समेत कोरोना देखा परेको छ । उनीहरु २१, ३३, २६, ३० र १८ वर्षका छन् । 

पर्वतको कुष्मा नगरपालिकाका २० वर्षीय पुरुष, फलेबासका वर्ष १९ र २२ तथा जलजला गाउँपालिकाका १६ वर्षीय पुरुषमा समेत कोरोना देखा परेको छ । 

तनहुँको व्यास नगरपालिकाका वर्ष ४२, २९ र २५ का पुरुष बागलुङ गलकोट नगरपालिकाका ३३ वर्षका पुरुष छन् । 

नवलपरासी (बर्दघाट सुस्ता पूर्व) को हुप्सेकोट गाउँपालिकाका ९ जना र विनयत्रिवेणी गाउँपालिकाका ४ जना पुरुषमा कोरोना पुष्टि भएको छ । हुप्सेकोटका वर्ष २० देखि ४० वर्ष उमेर समूहका छन् भने विनयत्रिवेणीका वर्ष २६, ३३, ३१र ३५ का पुरुष हुन् । 

यसैगरी, भरतपुर महानगरपालिकास्थित भरतपुर कोरोना विशेष अस्पतालमा गरिएको नमुना परीक्षणमा पर्वतकै थप ५ जनामा कोरोना देखा परेको छ । स्वास्थ्य निर्देशनालयले प्रेषित गरेको बिहीबारको दोस्रो विज्ञप्तिअनुसार कुश्मा नगरपालिकाका ४२ वर्षीय पुरुष र २० वर्षीया महिलामा कोरोना पुष्टि छ । त्यस्तै, मोदी गाउँपालिकाका ३० वर्षीय पुरुष र फलेबास नगरपालिकाका वर्ष ३० र ३७ का २ पुरुषमा कोरोना देखा परेको हो ।

फलेबासका २ जना पुरुषहरु कुश्मा नगरपालिकाको क्वारेन्टाइनमा रहँदैआएकोमा अन्य भने सम्बन्धित पालिकाकै क्वारेन्टाइनमा बस्दैआएका थिए । उनीहरु समेत सबैजना भारतबाट फर्केका हुन् । संक्रमितलाई कुष्मा नगरपालिकामा रहेको कोरोना अस्पतालको आइसोलेसन कक्षमा लैजाने तयारी भएको प्रदेश स्वास्थ्य निर्देशनालयका निर्देशक एवं गण्डकी प्रदेश कोरोना नियन्त्रण तथा रोकथाम कार्यक्रमका प्रवक्ता डा. विनोदबिन्दु शर्माले जानकारी दिए । 

यसैबीच, गण्डकीमा बिहीवार बिहान नवलपरासी (बर्दघाट सुस्ता पूर्व) मा १८ जना, तनहुँमा १२ जना, गोरखामा ११ जना र मनाङमा १ जना गरी ४२ जनामा संक्रमण पुष्टि भएको थियो । 

यसअघि एकैदिन अवधिमा जेठ २५ मा गण्डकीमा ३८ जनासम्म व्यक्तिमा कोरोना देखिएको थियो । गण्डकीमा कुल संक्रमितमध्ये १ जनाको मृत्यु र २१ जना निको भएका छन् । 

गण्डकी प्रदेशअन्तर्गत बागलुङमा गत चैत दोस्रो साता नेपालकै पाँचौ संक्रमित भनिएकी १९ वर्षीया युवती र छैटौं भनिएकी ६५ वर्षीया महिलामा कोरोना देखिएको थियो । उनीहरु बैशाख दोस्रो साता डिस्चार्ज भएसँगै प्रदेश सरकारले ग्रिन जोन अर्थात कोरोना नभएको प्रदेश भनी घोषणा गरेको हो ।