पाकिस्तानका प्रधानमन्त्री इमरान खानले सोमवार कराचीस्थित स्टक एक्सचेन्ज कार्यालयमा भएको विस्फोटमा भारतको हात रहेको विषयमा कुनै शंका नरहेको बताएका छन् ।

मंगलवार संसदमा सम्बोधन गर्ने क्रममा उनले भने, ‘मुम्बईमा जे भयो, कराचीमा पनि त्यही गर्ने चाहना उनीहरूको थियो । उनीहरू अनिश्चितता फैलाउन चाहन्थे । भारतले नै यो गराएको हो भन्नेमा हामीलाई कुनै शंका छैन ।’ 

आफ्नो सम्बोधनमा उनले आक्रमणको प्रतिकारका क्रममा ज्यान गुमाउन पुगेका एक प्रहरी सई र तीन सुरक्षा गार्डको प्रशंसा समेत गरे । उनले तिनीहरूलाई पाकिस्तानका नायक भने । 

‘उनीहरूले बलिदान दिए र ठूलो घटना हुनबाट रोके । भारतले हामीलाई अस्थिर बनाउन यसको योजना बनाएको थियो ।’ आक्रमणकारीहरूसँग टन्नै हातहतियार भएको र उनीहरूले बन्धक पनि बनाउन चाहेको उनले बताए । 

‘सबै निकायहरू उच्च सतर्कतामा थिए भन्ने कुरा मेरो मन्त्रिपरिषद् र मन्त्रीहरूलाई थाहा छ । हाम्रा निकायहरूले आतंकवादी आक्रमणका कम्तीमा चारवटा प्रयासलाई निष्फल पारिसकेका छन्,’ उनले भने । 

‘हामीहरू पूर्ण तयारी अवस्थामा थियौं । यो हाम्रो लागि ठूलो विजय हो,’ उनले सुरक्षा निकायको प्रशंसा गर्दै भने ।