जिल्लाका स्थानीय तहले नागरिकलाई खानेपानीको सहज आपूर्तिका लागि एक घर एक धारा कार्यक्रम सञ्चालन गरेका छन् ।

जिल्लाको माण्डवी गाउँपालिकाले जनतालाई खानेपानीको सहज पहुँच पुर्‍याउन एक घर एक धारा कार्यक्रम सञ्चालन गरेको छ । 

आव २०७४/७५ देखि नै पालिकाका विभिन्न क्षेत्रमा खानेपानीकोे सहज आपूर्ति गराइ एक घर एक धारा बनाउने अभियान शुरू गरेको हो ।

मानिसको पहिलो आधारभूत आवश्यकता पानी नै भएकाले पालिकाले यो कार्यक्रम सञ्चालन गरेको गाउँपालिका अध्यक्ष श्रीधर रोकामगरले बताए ।

पालिकाले अघिल्लो आवमा साना ठूला गरी २० वटा खानेपानीका योजना सञ्चालन गरेको थियो । जसका लागि २ करोड १५ लाख रुपैयाँ बजेट विनियोजन भएको थियो । यसबाट ८०० घरधुरीका करीब ४ हजार जनता लाभान्वित भएको गाउँपालिका प्राविधिक सागर पण्डितले बताए । 

चालू आवमा पनि पालिकाका २३० घरधूरीमा धारा निर्माण गरिए र यसबाट करीब १ हजार ४०० जनता लाभान्वित भएका छन् । पालिकाले यसका लागि पनि २६ लाख रुपैयाँ बजेट विनियोजन भएको थियो । पालिकाकै बजेटबाट आँपचौर लिफ्ट खानेपानी र उदयपुरकोट लिफ्ट खानेपानीको काम पनि सञ्चालन गरेको प्राविधिक पण्डितले बताए ।

पालिकाबाट चालू आवमा दुवै योजनाका लागि १५/१५ लाख रुपैयाँ बजेट विनियोजन गरिएको छ । पालिकाले आगामी वर्षमा पनि एक घर एक धारा अभियानलाई निरन्तरता दिने भएको छ ।

प्युठान नगरपालिकाले चालू आर्थिक वर्षमा नगर क्षेत्रमा ३५० घरमा धारा निर्माण गरेको छ । चालू आवमा ८०० घरधुरीमा धारा पुर्‍याउने लक्ष्य नगरपालिकाको रहेपनी बन्दाबन्दीले काम गर्न नपाएको नगर प्रमुख अर्जुनकुमार कक्षपतिले बताए ।

चालू आवमा ८ करोड ५० लाख बजेट विनियोजन गरिएको थियो । आगामी वर्षमा पनि नगरपालिकाले करीब ८०० घरमा धारा निर्माण गर्ने नगर प्रमुख कक्षपतिले बताए । नगर क्षेत्रमा २०७४ पश्चात करीब १ हजार २०० घरमा धारा निर्माण गरिएको उनले बताए ।

जिल्लाकै गौमुखी गाउँपालिकामा हालसम्म २०१ घरमा धारा निर्माण भएका छन् । पश्चिम नेपाल ग्रामीण खानेपानी तथा सरसफाइ परियोजनामार्फत–२ अर्खामा १५१ र वडा नम्बर ३ रजवारामा ५० घरधुरीमा धारा निर्माण भएको गाउँपालिका अध्यक्ष विष्णु गिरीले बताए । वडा नम्बर ४ पूजामा केन्द्र र प्रदेश सरकारको २ करोड ५० लाख लगानीमा गौथलेमुल लिफ्ट खानेपानी आयोजना निर्माण भइरहेको अध्यक्ष गिरीले बताए ।

आयोजना निर्माण पश्चात यहाँका २०० घरधुरी लाभान्वित हुने छन् । गाउँपालिकाले आगामी आर्थिक वर्षमा एक घर एक धारा कार्यक्रमका लागि १ करोड बजेट विनियोजन गरेको छ ।