रुसलाई एक्ल्याउने, चीनसँग नजिकिन खोज्ने र सिरियामा अमेरिकी हस्तक्षेपको पैरवी गर्ने एन्टोनी ब्लिन्केनलाई जो बाइडनले परराष्ट्रमन्त्री बनाउने भएका छन् । बाइडनको परराष्ट्रनीति सैन्य कारवाही तथा बहुराष्ट्रिय उद्देश्यमा आधारित रहने संकेत यसबाट पाइएको छ । 
 

ब्लिन्केन बाहेक जोन केरीलाई पनि बाइडनले मन्त्री बनाउने भएका छन् । केरी जलवायु मन्त्रालयका मन्त्री बन्ने भएका हुन् । ओबामा–बाइडन प्रशासनमा उनी परराष्ट्रमन्त्री थिए । 
 

ब्लिन्केन बाइडनलाई लामो समयदेखि परराष्ट्रनीतिमा सल्लाह दिँदै आइरहेका छन् र बाराक ओबामाको कार्यकालमा उनी परराष्ट्र राज्यमन्त्री थिए । विश्वव्यापीकरणवादीहरूले उनी अनुभवी र सम्मानित व्यक्तित्व भएको भन्दै ​बाइडनको छनोटको प्रशंसा गरेका छन् । 
 

ब्लिन्केनका आलोचकहरू चाहिँ ट्रम्पको कार्यकालमा उनले धनीहरूका लागि काम गरेर आफू धनी बनेको बताइरहेका छन् । तर त्यसभन्दा पनि उनले पहिला नवअनुदारवादी नीति अपनाएको र अहिले पनि त्यसै गर्ने हुन् कि भनी चिन्ता व्यक्त गरिएको छ । 

उनले अमेरिकालाई इराक युद्धमा जान र लिबिया तथा यमनमा बम बर्साउन पैरवी गरेका थिए । 

सिरियामा वाशिङटनले सैन्य हस्तक्षेप बढाउनुपर्ने उनी अझै पनि तर्क गरिरहेका छन् । गत मे महिनामा उनले एक अन्तर्वार्ता दिँदै ओबामा प्रशासनले सिरियाको खतरनाक स्थिति रोक्न पर्याप्त प्रयास नगरेको गुनासो गरेका थिए । अनि ट्रम्पको पालामा त्यहाँबाट सैनिक फिर्ता बोलाएर बशर असदको सत्तामा अमेरिकी दबाब घटाएको भनी आलोचना गरेका थिए । 
 

ब्लिन्केनले बाइडनलाई नेटो बलियो बनाउन अनि रुसलाई राजनीतिक रूपमा एक्ल्याउन कोशिश गर्नेछन् । 

चीनको सन्दर्भमा कुरा गर्दा उनले बेइजिङसँग सहकार्य गर्ने उपाय वाशिङटनले खोज्ने बताएका छन् । ट्रम्पले कमजोर बनाएको अन्तर्राष्ट्रिय साझेदारीलाई पुनः बलियो बनाएर चीनसँग शक्तिशाली अडानका साथ व्यवहार गर्ने उनको सोच छ ।