२८ जेठ २०८३, बिहीबार
नेपाल सरकारले लिम्पियाधुरा र लिपुलेक सहितको नेपालको नयाँ नक्सा सार्वजनिक गरेसँगै नेपाल राष्ट्र बैंकले नयाँ नक्सा अंकित सिक्का प्रचलनमा ल्याउने भएको छ ।
नेपालको नयाँ नक्सासहितको सिक्का प्रचलनमा ल्याउन मन्त्रिपरिषद्को बैठकले नेपाल राष्ट्र बैंकलाई स्वीकृति समेत प्रदान गरिसकेको छ ।
नेपाल राष्ट्र बैंकका सहायक प्रवक्ता नारायणप्रसाद पोखरेलले राष्ट्र बैंकले लिम्पियाधुरा र लिपुलेक सहितको नेपालको नयाँ नक्सा अंकित सिक्का टंकनको तयारी गरिरहेको जानकारी दिए । नापी विभागबाट लिम्पियाधुरा र लिपुलेक सहितको नेपालको नयाँ नक्सा लिने काम भइरहेको बताउँदै उनले सिक्का छाप्न बोलपत्र आह्वान गर्न आवश्यक प्रक्रिया शुरू भइसकेको स्पष्ट पारे ।
‘मुलुकको नयाँ नक्सा अंकित सिक्का छाप्न मन्त्रिपरिषद्को बैठकले नेपाल राष्ट्र बैंकलाई स्वीकृति प्रदान गरिसकेको छ । मन्त्रिपरिषद्को स्वीकृतिअनुसार १ रुपैयाँ दरको सिक्का ३० करोडवटा र २ रुपैयाँ दरका १० करोड वटा छाप्ने तयारी भइरहेको छ,’ सहायक प्रवक्ता पोखरेलले भने । गोरखापत्र दैनिकमा खबर छ ।
