२९ असार २०८३, सोमबार
अर्को वर्ष अर्थात् २०७८ असार १७ गते चिनियाँ कम्युनिस्ट पार्टीले शतवार्षिकी समारोह मनाउँदैछ ।
पार्टी स्थापनाको सय वर्ष पुगेको यो अवसरलाई निकै धुमधामका साथ मनाउने योजना चीनले बनाइरहेको छ । चीनको राजनीतिक नेतृत्वले यस अवसरलाई थप सुमधुर बनाउनका लागि विगत १० वर्षदेखि अर्थतन्त्रलाई मजबूत बनाउँदै लगेको छ ।
सन् २०१० मा तत्कालीन राष्ट्रपति हु चिन्ताओले देशको कुल गार्हस्थ्य उत्पादन सन् २०२१ सम्ममा दुईगुणा बढ्नुपर्ने बताएका थिए ।
चीनको त्यो महत्त्वाकांक्षी लक्ष्यप्राप्तिमा कोरोनाभाइरस महामारीले खलनायकको भूमिका निर्वाह गरिदियो । तर चीनले कोभिड–१९ बाट मुक्त हुनका लागि असाधारण प्रयास गरेकाले अन्य देशमा जस्तो गरी मानिसहरूको मृत्यु पनि भएन अनि अर्थतन्त्र पनि बलियै रह्यो ।
अन्य देशको अर्थतन्त्र खुम्चिरहँदा चीनको अर्थतन्त्र चाहिँ सन् २०२० मा बढेकै छ ।
चीनमा निजी उपभोग सन्तोषजनक रूपमा बढ्दै गएको छ । दोहोरो परिचालनको नीति अपनाएर चीनले देशभित्रै सामान खपत गराउने नीतिलाई अघि बढाइरहेको छ । जुलाई महिनामा चिनियाँ कम्युनिस्ट पार्टीले शतवार्षिकी मनाउन लाग्दा थप आर्थिक सुधार देखिने अर्थशास्त्रीहरूले प्रक्षेपण गरेका छन् ।
चीनको निजी क्षेत्र नै अर्थतन्त्रको सबभन्दा बलियो आधार हो । चीनको प्रविधि र इन्टरनेट कम्पनीहरू बढ्दै गइरहेका छन् र तिनको महत्त्वाकांक्षा पनि चुलिँदै गएको छ ।
यसले गर्दा विदेशी लगानीकर्ताहरू चीनको बजारमा अपार सम्भाव्यता देखेर थप आकर्षित बनिरहेका छन् ।
अलीबाबा कम्पनीले अन्लाइन मार्केटिङमार्फत आक्रामक व्यापार गरिरहेको छ । उसले आफ्ना प्रतिस्पर्धीहरूलाई व्यापार गर्न नदिएको भन्दै सरकारले लगाम कसेको छ र अन्य निजी कम्पनीहरू झनै उत्साहित भएका छन् ।
मेइतुआन दियानपी नामक कम्पनीले अन्लाइन मार्केटिङको क्षेत्रमा विगत १० वर्षदेखि राज चलाइरहेको छ र उसको सम्पत्ति लगभग १८० अर्ब डलर छ । कम्पनीले आफ्नो अन्लाइन प्ल्याटफर्ममार्फत दिनको १ करोड खरिददारी गराउने लक्ष्य लिएको छ जुन चीन जस्तो ठूलो देशका लागि पनि निकै महत्त्वाकांक्षी देखिन्छ ।
अन्य क्षेत्रहरूमा पनि आर्थिक वृद्धिको प्रचुर सम्भावना देखिएको छ । त्यसैले धेरै लगानीकर्ताहरूले चिनियाँ कम्युनिस्ट पार्टी भव्य शतवार्षिकी मनाउन पूर्ण हकदार रहेको अनुभव गरिरहेका छन् ।
