नेपाल कम्युनिस्ट पार्टी (नेकपा) प्रचण्ड–नेपाल समूहका स्थायी कमिटी सदस्य, पूर्वमन्त्री तथा सांसद योगेश भट्टराईले ताप्लेजुङको मेरिङ्देन गाउँपालिका–३ दोभान बजारमा भइरहेको आगलागी नियन्त्रणमा जुट्न सबैलाई अनुरोध गरेका छन् ।

मंगलवार सामाजिक सञ्जाल ट्विटरमा लेख्दै नेता भट्टराईले अनुरोध गरेका हुन् ।

उनले लेखेका छन्, ‘ताप्लेजुङ् जिल्लाको दोभान बजारमा भीषण आगलागी । ठूलो मात्रामा भौतिक सम्पत्तिको क्षति । आगलागी नियन्त्रणमा जुट्न सबैमा हार्दिक अनुरोध गर्दछु ।’

मंगलवार बिहान १० बजे भोला पौडेलका घरबाट विद्युत् चुहिएर आगलागी भएको स्थानीय गणेश कार्कीले बताए । दोभान बजारमा अहिले ३५ घर जलेर पूरै नष्ट भइसकेका जनाइएको छ ।

उनले भने, ‘आगो नियन्त्रणभन्दा बाहिर गइसक्यो, केही घर भत्काएर अग्नि नियन्त्रण रेखा कोर्ने काम गर्दैछौं ।’ 

ताप्लेजुङको दमकल आगलागी क्षेत्रमा पुगेको र छिमेकी जिल्ला पाँचथरदेखि पनि आउँदै गरेको जिल्ला प्रहरी कार्यालयका प्रमुख बालरनसिंह राणाले जानकारी दिए । उनले भने, ‘म पनि आगलागी क्षेत्रमा जाँदैछु । आगलागी भीषण छ भन्ने खबर आएको छ ।’

सुरक्षाकर्मी र स्थानीयले आगो नियन्त्रण गर्ने पहल गरिरहेको कार्कीले जानकारी दिए ।