गण्डकी प्रदेशका मुख्यमन्त्री पृथ्वीसुब्बा गुरुङले लिएको विश्वासको मतसम्बन्धी नतिजा औपचारिक घोषणा अघि नै आउट भएको छ ।
सभामुख नेत्रनाथ अधिकारीले मतविभाजनको घोषणाअघि प्रदेशसभा सचिवालयका कर्मचारीहरुसँग परामर्श गर्दा सबै विषय लाइभमा सुनिएपछि औपचारिक घोषणाअघि नै सञ्चारमाध्यमबाट बाहिरिएको हो ।

उनले झण्डै ५ मिनेट कर्मचारीहरुसँग मत गन्नेदेखि पक्षविपक्षमा प्राप्त भएको मत संख्याबारे सल्लाह गर्दैगर्दा प्रदेशसभाको सबै गतिविधि लाइभमा सुनिएको थियो । सभामुखले माइक बन्द नगरी परामर्श गर्दा यसरी नतिजा पहिल्यै बाहिरिएको हो ।

प्रदेशसभामा मत विभाजन हुँदा गुरुङको पक्षमा २७ मत प्राप्त भयो भने विपक्षमा ३० मत प्राप्त भयो । प्रदेशसभामा ५७ सांसद मतदान प्रक्रियामा सहभागी भएका थिए । उपस्थित ५८ मध्ये एक जनाले भने कसैलाई मत दिएनन् ।  ६० सदस्यीय प्रदेशसभामा बहुमतका लागि ३१ प्रदेशसभाको मत चाहिन्थ्यो ।