हङकङमा लोकतन्त्रपक्षधर सबभन्दा ठूलो दैनिक पत्रिका एप्पल डेली बन्द गरिने भएको छ । 

शनिवारसम्ममा उक्त पत्रिका बन्द हुने स्थानीय सञ्चारमाध्यमहरूले खबर दिएका छन् । 

चीनले उक्त दैनिकलाई पृथक्तावादीहरूको पक्षपोषक बताउँदै आएको छ । 

उक्त पत्रिकाका कार्यालयहरूलाई प्रहरीले गत साता छापा मारेको थियो । पत्रिकाका कतिपय समाचारले राष्ट्रिय सुरक्षा कानून उल्लंघन गरेको आरोप छ । 

पत्रिका चलाउने कम्पनीको लगभग एक करोड ८० लाख हङकङेली डलर पछि रोक्का गरिएको थियो । प्रहरीले पत्रिकाका प्रधानसम्पादक तथा पाँच अन्य कार्यकारीलाई हिरासतमा लिएको थियो । 

यो पत्रिका हङकङ तथा चिनियाँ नेतृत्वको आलोचक रहिआएको छ । 

यसका संस्थापक जिम्मी लाइ विभिन्न आरोपमा कैद सजाय भोगिरहेका छन् । 

पत्रिकाका बोर्ड सदस्यहरूले एक बयान जारी गर्दै २६ वर्ष पुरानो पत्रिका बढीमा शनिवारसम्म मात्र प्रकाशन गरिने र यसको डिजिटल संस्करण पनि त्यही दिनबाट अफलाइन जाने जनाएका छन् ।