आसन्न महाधिवेशनमा सभापतिमा उठ्ने बताउँदै आएका नेपाली कांग्रेसका उपसभापति विमलेन्द्र निधिले कांग्रेस बरिष्ठ नेता रामचन्द्र पौडेलसँग भेटवार्ता गरेका छन् । निधिले बुधवार कांग्रेस बरिष्ठ नेता पौडेलसँग बोहोराटारस्थित निवासमा पुगेर महाधिवेशनको विषयमा छलफल गरेका हुन् । 

पौडेललाई भेटेर निधिले आफू सभापतिमा उठ्न लागेको भन्दै सहयोग माग गरेका हुन् । सभापति शेरबहादुर देउवा पक्षबाट सभापतिमा उठ्ने घोषणा गरेका निधिले पछिल्लो दिनमा नेताहरूसँगको भेटवार्ता तीब्र बनाएका छन् । 

पौडेलले भने क्रियाशील सदस्य र समायोजनको विषय टुंगाउन सुझाव दिएको पौडेलका स्वकिय सचिव चिरञ्जीवी अधिकारीले लोकान्तरलाई जानकारी दिए ।  ‘उपसभापतिको नाताले पहिला क्रियाशील सदस्यता सम्बन्धी बिवाद र समायोजनको मुद्दा टुंगाउन आग्रह गर्दै त्यसपछि नेतृत्वको कुरा गरौंला’ पौडेलले निधिसँग भनेका थिए । 

कांग्रेसको महाधिवेशन आगामी भदौ १६ देखि १९ गतेसम्म काठमाडौंमा सम्पन्न हुँदैछ ।