मध्यरातमा कोरोना विरुद्धको खोप बोकेर नेपाली कांग्रेसका कार्यकर्ताको घरमा पुगेको भन्दै विराटनगर महानगरपालिकाका मेयर भीम पराजुली विवादमा तानिएका छन् ।

मेयर पराजुलीविरुद्ध महानगरपालिकाको गेटमा युवाले बिहीवार नारा जुलस नै गरेका छन् ।

‘रातिराति खोप दिन पाइँदैन’, ‘क्रियाशील सदस्यलाई खोप दिन पाइँदैन’, ‘जनता खोप वेटिङमा, मेयरसा’प शेटिङमा’, ‘मेयर पराजुली मुर्दावाद’ लगायतका नारा लगाएर वाईसीएल र केही अन्य युवाले नाराजुलुस गरेका छन् । 

बुधवार राति खोपसहित विराटनगर महानगरपालिका–५ निवासी कांग्रेस बुथ समितिका सभापति बिमलराज भण्डारीको घरमा पुगेर मेयर पराजुलीले कार्यकर्तालाई खोप लगाइदिएको आरोप छ । खोपको लागि कांग्रेस निकट कार्यकर्तालाई मात्र खबर गरिएको स्थानीयको आरोप छ ।

गुपचुप रूपमा पार्टी निकटलाई मात्र खोप दिएको सूचनापछि स्थानीय क्षेत्रमा ठूलो भीड जम्मा भएको थियो । आक्रोशित स्थानीयले मेयर पराजुलीलाई लखेटेको जनाइएको छ । स्थानीयको विरोधपछि मेयर पराजुली दौड्दै कांग्रेस नगर उपसभापति प्रविण जोशीको गाडी चढेर भागेका स्थानीयको आरोप छ ।

महानगरको अभिभावकबाट भएको हर्कत नसच्याए आन्दोलन गर्ने वाईसीएल विराटनगर महानगर इन्चार्ज आजम प्रवेशले चेतावनी दिए ।

घटनाबारे प्रतिक्रिया लिन मेयर पराजुलीसँग सम्पर्क गर्न खोज्दा उनी सम्पर्कमा आएनन् । पटक–पटक फोन गरेपनि उनले फोन उठाएनन् । मेयर पराजुलीका प्रेस सल्लाकार कौशल निरौलाले कांग्रेसको अधिवेशन नजिकिएकाले मेयरविरुद्ध झूटा प्रचार गरिएको बताए ।

साउन १२ र १३ गते विराटनगरमा लगाइएको खोपमा समेत तोकिएको उमेर समूहलाई नभई आफन्तलाई लगाएको आरोप मेयर पराजुलीमाथि छ ।