२१ असार २०८३, आइतबार
गृहमन्त्री बालकृष्ण खाणले भारतीय सीमा सुरक्षा बल (एसएसबी)ले तुइन काट्दा बेपत्ता भएका दार्चुलाका जयसिंह धामीका सम्बन्धमा छानबिन गर्न गठित समितिले दिने प्रतिवेदनका आधारमा सरकारले दृढतापूर्वक अडान लिने बताएका छन् ।
मंगलवार प्रतिनिधि सभा बैठकमा सांसदहरूले सोधेका प्रश्नको जवाफ दिँदै गृहमन्त्री खाणले छानबिन समितिको प्रतिवेदनलाई सरकारले दृढतासाथ अगाडि बढाउने बताएका हुन् । दार्चुला घटनाका सम्बन्धमा संसदीय छानबिन समिति गठन गर्नुपर्ने एमालेको मागबारे गृहमन्त्रीले जवाफ दिएनन् ।
‘दार्चुला घटना सम्बन्धमा माननीय सदस्यहरूको संवेदनशीलताको सम्मान गर्छु । सरकारले छानबिन समिति बनाएको छ । समिति दार्चुला जिल्ला र घटना घटेको मालघाटमा पुगेर छानबिन गर्नेछ । तुइन तर्न सफल भएकासँग पनि भेटघाट गर्नेछ । उहाँहरूको जानकारीलाई पनि छानबिन समितिले आधार बनाउने छ । सत्यतथ्य संकलन गरेरै प्रतिवेदन बनाइने हो,’ गृहमन्त्री खाणले भने, ‘प्रतिवेदनले गरेको निष्कर्षलाई सरकाले दृढता साथ अगाडि बढाउने छ । नागरिकको जीवनरक्षाका लागि नै राज्य र सरकार बनेको हो । नागरिकको जीवन रक्षामा हामी गम्भीर छौं ।’
एमाले सांसदहरूले घटना सम्बन्धमा गृहमन्त्रीको सम्बोधन फितलो भएको बताउँदै संसदीय छानबिन समिति गठनको माग गरेका थिए । ‘छानबिन समितिको प्रतिवेदन आइसकेपछि अन्तिम निष्कर्ष निस्किने छ । त्यो तथ्यका लागि अडान लिने र दृढताका साथ अगाडि बढाउने विश्वास दिलाउँछु,’ गृहमन्त्री खाणले भने ।
एमालेले दार्चुला घटना सम्बन्धमा भारतसँग औपचारिक विरोध जनाउन सरकारको ध्यानाकर्षण गराएको थियो ।
