प्रदेश अध्यक्ष बन्न होडबाजी

माओवादीमा सुदूरपश्चिम प्रदेश अध्यक्ष बन्न होड : बीना, नरेन्द्र वा नेपबहादुर कसले मार्ला बाजी ?

लखन चाैधरी
लखन चाैधरी

लखन चौधरी लोकान्तरका लागि सुदूरपश्चिम प्रदेश प्रतिनिधि हुन् । 

माओवादीमा सुदूरपश्चिम प्रदेश अध्यक्ष बन्न होड : बीना, नरेन्द्र वा नेपबहादुर कसले मार्ला बाजी ?

नेपाल कम्युनिस्ट पार्टी (माओवादी केन्द्र)ले केन्द्रदेखि वडा तहसम्म धमाधम संगठन विस्तार तथा नेतृत्व चयनलाई तीव्रता दिएको छ ।


Advertisement

केही साता अगाडि मात्रै माओवादी केन्द्रले सुदूरपश्चिम प्रदेश इञ्चार्जको जिम्मेवारी पार्टीका केन्द्रीय सदस्य खगराज भट्ट (डडेल्धुरा) र सह-इञ्चार्जको जिम्मेवारी लक्ष्मणदत्त जोशी (दार्चुला) तथा तारामान स्वाँर (अछाम) लाई दिएको छ ।


Advertisement

काठमाडौं–सदूरपश्चिम समन्वय समिति विभागको संयोजकको जिम्मेवारी भने वीरमान चौधरीले पाएका छन् ।

असोज–कात्तिकभित्र जिल्ला अधिवेशन, मंसिर १५ गतेभित्र प्रदेश अधिवेशन र पुसको ११, १२ र १३ गतेभित्र राष्ट्रिय सम्मेलन गर्ने कार्यतालिका अनुसार माओवादी केन्द्र संगठन विस्तार तथा नेतृत्व चयनमा लागेको हो ।


Advertisement

इञ्चार्ज तथा सह-इञ्चार्ज तोकिए पनि सुदूरपश्चिममा माओवादीको अध्यक्ष र सचिव को हुने भन्ने टुंगो लाग्न सकेको छैन ।

अध्यक्ष चयनका विषय निकै पेचिलो बनेको चर्चा माओवादी वृत्तमा छ ।

तत्कालीन नेकपामा छँदा अध्यक्ष कर्ण थापा (एमाले) र सचिव नेपबहादुर थारु चौधरी ‘सिंहराज’ (माओवादी) थिए । इञ्चार्जको जिम्मेवारीमा भीम रावल थिए ।

तर सर्वोच्चले एमाले र माओवादी केन्द्रलाई पूर्ववत् अवस्थामा फर्काएपछि माओवादीले अध्यक्ष र सचिव तोक्न सकेको छैन ।

प्रदेश अध्यक्षका लागि नेकपा छँदाका सचिव नेपबहादुर थारु (कैलाली), पूर्व खानेपानी मन्त्री बीना मगर (कञ्चनपुर) र नरेन्द्र कुँवर (बैतडी)को नाम चर्चामा छ । 

कसको पल्ला भारी ?

नेकपाकालीन जिम्मेवारीका कारण पनि नेपबहादुरको सम्भावना बलियो रहेको माओवादीका एक नेताले बताए । 

तर, कतिपयले भने पूर्व खानेपानी मन्त्री बीना मगरको नाम चर्चामा ल्याएका छन् । पार्टी अध्यक्ष पुष्पकमल दाहाल ‘प्रचण्ड’की बुहारी भएका नाताले पनि बीनाको नाम चर्चामा छ ।  

बीनालाई जिम्मेवारी दिँदा परिवारवादको आरोप लाग्ने भएकाले प्रचण्डले त्यस्तो निर्णय लिइहाल्दैनन् भन्नेहरू पनि छन् ।

कैलारी गाउँपालिका अध्यक्ष समेत रहेका नेता लाजुराम चौधरी ‘अंकित’ले प्रदेश अध्यक्षको जिम्मेवारीका लागि नेपबहादुर योग्य रहेको दाबी गरे ।

कैलालीको राजनीति, वरिष्ठता, जनभावना, योगदान र नेकपामा छँदा प्रदेश समिति सचिव रहेर कुशलतापूर्वक निर्वाह गरेको जिम्मेवारीका कारण पनि नेपबहादुर योग्य रहेको उनको जिकिर छ ।

प्रदेश अध्यक्षका लागि चर्चामा रहेका नेपबहादुरले पनि आफूले जिम्मेवारी पाउनुपर्ने आधार प्रस्तुत गरे ।

‘सचिवको जिम्मेवारी सफलतापूर्वक निर्वाह गरिसकेकाले अध्यक्षको जिम्मेवारी सोपानको आधारमा स्वतः मैले नै पाउनुपर्ने देखिन्छ,’ उनले भने, ‘हामी केन्द्रीय सदस्यमध्ये १ जनालाई सो जिम्मेवारी तोकिने हो । कसलाई कुन जिम्मेवारी दिने भन्ने निर्णय पार्टी अध्यक्ष (प्रचण्ड)मा निहीत छ ।’

यता बैतडीमा पार्टी जिल्ला कमिटी इञ्जार्चको जिम्मेवारी पाइसकेका नरेन्द्र कुँवर प्रदेश अध्यक्षका लागि खास प्रतिस्पर्धा आफू र बीना मगरबीच भएको दाबी गर्छन् ।

‘अध्यक्षको जिम्मेवारी सर्वप्रथम मैले र बीना मगरले निर्वाह गर्नुभएको हो । उहाँसँग नै मेरो प्रतिष्पर्धा हो । तर उहाँले खानेपानी तथा सरसफाइ विभागको जिम्मेवारी पाइसक्नुभएको छ । नेपबहादुरजी हालको बहालवाला सचिव भएकाले उहाँको पनि दाबी हो । हेरौं, पार्टीले कस्तो निर्णय गर्छ ?’

कुँवरलाई अध्यक्ष बनाउन अर्थमन्त्री जनार्दन शर्मा, प्रदेश इञ्चार्ज खगराज भट्टलगायत नेताहरूले लबिङ गरिरहेको बताइन्छ । यता नेपबहादुर थारुलाई भने ऊर्जामन्त्री पम्फा भुसाल, देव गुरुङलगायत नेताहरूको साथ छ ।

अध्यक्षका अकांक्षी धेरै हुनु र गुटउपगुट भित्रको दबाबका कारण पनि अध्यक्ष तोकिन ढिलाइ भएको छ । अध्यक्षको जिम्मेवारी टुंगो लाग्नेबित्तिकै सचिवको जिम्मेवारी पनि सहजै टुंगिने एक नेताले बताए ।

सुदूरपश्चिमबाट नेकपा माओवादी केन्द्रका १३ जना केन्द्रीय सदस्य छन् । १३ जना भित्रैबाट अन्य पदाधिकारीको पनि जिम्मेवारी तोकिने छ । 

भदौ महिनाभित्रै टुंगो लगाउने तयारी भएको बताइएको छ ।

माओवादी केन्द्रको स्थायी कमिटी बैठकले हालसम्म अधिकांश केन्द्रीय सदस्यहरूलाई जिम्मेवारी तोकिसकेको छ ।

केन्द्रीय सदस्यमध्ये रूपा चौधरीलाई कैलाली, देवीलाल चौधरीलाई कञ्चनपुर, त्रिलोचन भटट्लाई डोटी, देवराज रेग्मीलाई बझाङ, शरदसिंह भण्डारीलाई अछाम, नरेन्द्र कुँवरलाई बैतडी जिल्ला इन्चार्जको जिम्मेवारी दिइएको बताइएको छ । 

बीना मगरले खानेपानी तथा सरसफाइ विभागको जिम्मेवारी पाएकी छन् । हालसम्म जिम्मेवारी नपाउने केन्द्रीय सदस्यमा हालका प्रदेश सचिव थारु र रेणु चन्द (बैतडी) रहेका छन् ।

लखन चाैधरी
लखन चाैधरी

लेखकबाट थप...

कमेन्ट गर्नुहोस्