बलिउडका सुपरस्टार शाहरुख खानका छोरा आर्यन खानलाई क्रुज जहाजमा भएको लागूपदार्थ सहितको पार्टीमा आइतवार पक्राउ गरी बयान लिइएको छ । 

लागूऔषध नियन्त्रण ब्युरो (एनसीबी) ले उनीसँग सोधपुछ गरिरहेको छ र केरकारका क्रममा आर्यन खान रोएका छन् । 

यसैबीच शाहरुखले आफ्नो छोरा आर्यनसँग फोनमा कुरा गरेको एनसीबी स्रोतहरूलाई उद्धृत गर्दै भारतीय सञ्चारमाध्यमहरूले खबर दिएका छन् । आर्यन पक्राउ परेपछि कानूनी प्रक्रिया अन्तर्गत रही एनसीबीले आफ्नो ल्यान्डलाइनन फोनबाट आर्यनलाई शाहरुखसँग कुरा गर्न दिएको हो । 

आर्यनले लगभग चार वर्षदेखि लागूपदार्थ लिन थालेको सोधपुछको क्रममा खुलेको छ । उसले भारतबाहिर बेलायत र यूएईमा समेत ड्रग्स लिएको पाइएको छ । 

गोप्य सूचना पाएपछि एनसीबीले क्रुजमा छापा मार्दा १३ ग्राम कोकेन, पाँच ग्राम एमडी, २१ ग्राम चरेस, एमडीएमएका २२ वटा चक्का र १.३३ लाख भारु जफत गरेको छ ।

एनसीबीले आर्यन खान र अरबाज मर्चेन्ट समेत यस मुद्दाका अन्य आरोपितहरूको फोन जफत गरेर सबै मेसेज हरेको थियो । आर्यन लागूपदार्थका आपूर्तिकर्ता र दलालहरूको सम्पर्कमा रहेको त्यसबाट खुलासा भएको छ । त्यही प्रमाणका आधारमा एनसीबीले आर्यन र अरबाजलाई सँगै राखेर कडा सोधपुछ गरिरहेको छ ।