परराष्ट्रमन्त्री डा. नारायण खड्काले वर्तमान समयमा विश्व जगत्ले विगत ६० वर्ष पहिलेको भन्दा धेरै गहन र जटिल चुनौतीको सामना गरिरहेको बताएका छन् ।

उनले यी चुनौतीको समाधान गर्न असंलग्न आन्दोलनमा संलग्न मुलुकको ऐक्यबद्धता आजको अपरिहार्य आवश्यकता रहेको प्रस्ट पारेका छन् ।

असंलग्न आन्दोलन (नाम)को ६०औँ वार्षिकोत्सवको अवसरमा आयोजित उच्चस्तरीय बैठकलाई सर्बियाको राजधानी बेलग्रेडमा सम्बोधन गर्नुहुँदै मन्त्री खड्काले चुनौतीबाट माथि उठ्न नामको बलियो पहलको आवश्यकता रहेको औँल्याएको परराष्ट्र मन्त्रालयले जनाएको छ ।

उनले भने, “यस अवधिमा नामले विश्वभरिका देशका लागि स्वतन्त्रता, लोकतन्त्र र न्याय स्थापित गर्न सफलता हासिल ग¥यो, तैपनि आज हामी बढ्दो जातीय र अन्तर राज्य सङ्घर्ष, हिंसात्मक उग्रवाद, आतङ्कवाद, जलवायु परिवर्तन, आर्थिक मन्दी, वित्तीय कमजोरी, गरिब र धनीबीच असमानता, ठूलो अनुपातमा खाद्य र इन्धनको सङ्कट बढ्दै गएको देख्दैछौँ ।” असंलग्न आन्दोलनले शान्तिपूर्ण, समृद्ध र न्यायपूर्ण समाजको नेतृत्व गर्नुपर्ने औँल्याउँदै मन्त्री खड्काले यसले संयुक्त राष्ट्रसङ्घ, अन्तर्राष्ट्रिय वित्तीय संस्थालगायत बहुपक्षीय संस्थाहरूको सुधार र पुनर्गठनका लागि पनि काम गर्नुपर्नेमा जोड दिए ।
मन्त्री खड्काले आफ्नो सम्बोधनका क्रममा विश्वमा बढ्दै गएको

भू–राजनीतिक तनाव, परमाणु हतियारको आधुनिकीकरण र त्यसका लागि दौड र महाशक्ति राष्ट्रबीच त्यसका लागि प्रतिस्पर्धा नयाँ लहरले थप सङ्कट बढाएको प्रस्ट पारे। यस्तो अवस्थामा नामले आफ्नो सही स्थानको दाबी गर्दै गरिब, कमजोर र सङ्कटग्रस्त मुलुकका लागि आफ्नो आवाज बुलन्द पार्नुका साथै त्यहीअनुसार आफ्ना कार्यलाई गतिशिलता दिनुपर्नेमा मन्त्री खड्काले जोड दिए ।

उनले वर्तमान समयमा जलवायु परिवर्तन र कोभिड–१९ महामारी सबैभन्दा ठूलो चुनौतीका रूपमा अहिले उभिएको दर्शाए । यसले मानव समुदायको सुरक्षाको महत्वपूर्ण क्षेत्रमा देखिएको विश्वव्यापी शासनको अन्तर कमजोरीहरूलाई उजागर गरेको उनको भनाइ छ । उनले खोपमा पहुँचको असमानताको अवस्था सिर्जना गर्न धेरै हदसम्म योगदान गरेको सुनाए । गोरखापत्र दैनिकमा खबर छ ।