३० जेठ २०८३, शनिबार
अर्थमन्त्री जनार्दन शर्माले पत्रकारितासँग सम्बन्धित संघ, संगठनहरूलाई स्वतन्त्रतापूर्वक अघि बढ्न आग्रह गरेका छन् ।
नेकपा (माओवादी केन्द्र)का नेता समेत रहेका उनले राष्ट्रिय आत्मनिर्भरता, स्वाधिनताको रक्षा गर्दै समाजवादतिर अगाडि बढ्ने संवैधानिक अधिकारलाई स्थापित गर्ने कुरा नै सबै पत्रकारहरू र पत्रकारहरूसँग आबद्ध संघ, संगठनहरूको दायित्व भएको पनि बताएका हुन् ।
प्रेस सेन्टर नेपाल, गण्डकी प्रदेशको दोस्रो अधिवेशनलाई शनिवार पोखरामा उद्घाटन गर्दै उनले लोकतन्त्रको पक्षमा उभिने पत्रकार र त्यसका संगठनहरूलाई सरकारले सधैं सम्मान गर्ने बताए ।
अर्थमन्त्री शर्माले पत्रकारहरूलाई समाजवादतिर अगाडि बढ्ने गरी संगठन र विचारको निर्माण गर्न पनि सुझाव दिए ।
‘पत्रकार र त्यसका संगठनहरू स्वतन्त्रतापूर्वक अगाडि बढ्नु हुनेछ भन्ने मैले अपेक्षा गरेको छु । परिवर्तनबाट प्राप्त भएको उपलब्धि समाजवादतिर अगाडि बढ्ने संवैधानिक अधिकार जो छ, त्यो संवैधानिक अधिकार राष्ट्रिय आत्मनिर्भरता, स्वाधिनताको रक्षा गर्दै हामी समाजवादतिर अगाडि बढ्ने मान्यतालाई स्थापित गर्ने कुरा नै प्रेस सेन्टर र समस्त पत्रकारहरूको दायित्व हो भन्ने कुरा म यहाँ राख्न चाहन्छु,’ उनले भने, ‘त्यसको लागि कस्तो संगठन आवश्यक छ ? कस्तो विचार आवश्यक छ ? लोकतन्त्रको पक्षमा उभिएका प्रेस सेन्टर मात्रै होइन, अन्य संगठनहरूले पनि लोकतन्त्रको पक्षमा गरेको संघर्ष, त्यो योगदान र बलिदानलाई हामीले त्यही रुपमा सम्मान गर्नु पर्दछ । ती सबै लोकतन्त्रको पक्षमा उभिन पत्रकारहरूका सबै संगठनहरूलाई पनि सम्मान गर्न चाहन्छु ।’
अर्थमन्त्री शर्माले खोज तथा अनुसन्धानमूलक पत्रकारितामा जोड दिनुपर्ने आवश्यकता औंल्याए । उनले पत्रकारहरूको क्षमता वृद्धिका लागि आवश्यक सहयोग गर्न सरकार तयार रहेको बताए ।
