२२ असार २०८३, सोमबार
चीनले अमेरिकाको प्रविधि रुसमार्फत चोरेर हाइपरसोनिक क्षेप्यास्त्र बनाएको अमेरिकाका पूर्व राष्ट्रपति डोनल्ड ट्रम्पले दाबी गरेका छन् ।
बुधवार ह्यु हिविटको रेडियो शोमा कुरा गर्दै ट्रम्पले भने, ‘थाहा छ, ओबामा प्रशासनको कसैले उनीहरूलाई हाइपरसोनिक सम्बन्धी हाम्रो प्रविधि दियो । रुसले यो प्रविधि पायो अनि चीनले शायद रुसबाट त्यो पायो । चिनियाँहरू आफैंले प्रविधि विकसित गरे जस्तो लाग्दैन । उनीहरूले शायद रुसबाट पाए । शायद अमेरिकाको कुनै खराब जासूसले दियो होला ।’
ट्रम्पले यस विषयमा थप विवरण दिएनन् ।
गत जुलाई महिनामा चीनले हाइपरसोनिक क्षेप्यास्त्र परीक्षण गरेपछि ह्वाइट हाउसले आफूहरू यस प्रविधिमा चीन र रुसको बराबरी गर्न लागिपरेको बताए ।
चीनले हाइपरसोनिक क्षेप्यास्त्रको सफल परीक्षण गरेपछि अमेरिकाका वैज्ञानिकहरू छक्क परेका थिए । आणविक वारहेड बोक्ने क्षमता भएको उक्त क्षेप्यास्त्रले अमेरिकाको क्षेप्यास्त्र प्रतिरोधी प्रणालीलाई बेकामे तुल्याइदिन सक्छ ।
