०२ असार २०८३, मंगलबार
रुसका एक शीर्ष रक्षा अधिकारीले साइबरस्पेसमा नयाँ विश्वव्यापी द्वन्द्व शुरू भइसकेको बताएका छन् ।
यस डिजिटल युद्धका उत्पन्न जोखिम घटाउनका लागि रुसले अमेरिकासँग सहकार्य गर्ने अपेक्षा गरेको पनि उनले बताए ।
रुसको परराष्ट्र मन्त्रालयमा सूचना सुरक्षामा अन्तर्राष्ट्रिय सहकार्य हेर्ने अधिकारी आन्द्रे क्रुतस्किखले बिहीवार एक प्राज्ञिक सम्मेलनमा यो कुरा बताएका हुन् । अहिलेको युगमा साइबर आक्रमणहरूले तीव्रता पाएको र त्यसले गर्दा विश्व नै द्वन्द्वको स्थितिमा रहेको तर मानिसहरूले त्यो थाहा नपाएको उनले बताए ।
‘कडा युद्ध भइरहेको छ,’ मस्को स्टेट इन्स्टिच्युट अफ इन्टरनेसनल रिलेसन्समा सम्बोधन गर्दै उनले चेतावनी दिए । ‘यो गोप्य किसिमको छ तर साइबरस्पेसमा काटाकाट चलिरहेको छ । यसलाई सञ्चारमाध्यमले तेस्रो विश्वयुद्धको नाम दिएको सही हो । यसले गरेको क्षति, कसले यो युद्ध हार्छ र युद्धपछि विश्वको हालत कस्तो हुन्छ भन्ने कुरा हामीलाई थाहा छैन ।’
डिजिटल युद्धका विषयमा अन्तर्राष्ट्रिय सहमति बनाउन संयुक्त राष्ट्रसंघको संरचनालाई उपयोग गर्नुपर्नेमा रुसको जोड रहेको क्रुतस्किखले बताए । तर यस विषयलाई प्राथमिकता दिने मस्कोको प्रयासमा अमेरिका तथा अन्य मुलुकहरूले अवरोध गरेको उनको भनाइ छ ।
