सरकारले एमसीसी सम्झौतालाई संसदमा टेबुल गर्न सभामुख अग्निप्रसाद सापकोटालाई आग्रह गरेको छ ।

कानून, न्याय तथा संसदीय मामिलामन्त्री दिलेन्द्रप्रसाद बडूले आइतवार सभामुख सापकोटालाई भेटेर एमसीसीका सम्बन्धमा सदनमा बहस गराउन आग्रह गरेका हुन् ।

जवाफमा सभामुख सापकोटाले प्रमुख प्रतिपक्षी दल नेकपा एमालेको अवरोध जारी रहेकाले संसदमा बहस गर्ने वातावरण नभएको बताएको स्रोतले बतायो ।

'सभामुखले सदनमा छलफलको वातावरण छैन, बरु छलफलको वातावरण बनाउनका लागि दलहरूले थप पहल गरुन् भन्ने जवाफ बडूलाई दिएका छन्,' स्रोतले लोकान्तरसँग भन्यो ।

यता सभामुख सापकोटाको सचिवालयले भने संसद सुचारु गर्ने विषयमा छलफल भएको बताएको छ ।

'संसदलाई सुचारु गर्ने विषयमा सभामुखज्यू र कानूनमन्त्रीबीच छलफल भएको हो, अरू कुरा जानकारी छैन,' सभामुख सापकोटाका प्रेस संयोजक श्रीधर न्यौपानेले लोकान्तरसँग भने ।

एमसीसी सम्झौता संसद् सचिवालयमा दर्ता भएको लामो समय बिते पनि सभामुखले संसदमा टेबुल गरेका छैनन् ।