नेपाली कांग्रेसका नेता डा. शेखर कोइरालाले स्थानीय चुनावमा गठबन्धन भए त्यसलाई अस्वीकार गर्ने नेकपा माओवादीका अध्यक्ष पुष्पकमल दाहाल ‘प्रचण्ड’लाई बताएका छन् । 

बिहीवार बिहान प्रचण्डनिवास खुमलटारमा भएको भेटमा कोइरालाले यस्तो बताएका हुन् । प्रचण्डको निमन्त्रणामा कोइराला खुमलटार पुगेका थिए ।
 
भेटमा माओवादी केन्द्रका अध्यक्ष प्रचण्डले आगामी चुनावमा गठबन्धन गरेर जानुपर्ने भन्दै विरोध नगर्न अनुरोध गरेको भेटमा सहभागी कांग्रेस नेता अमरेशकुमार सिंहले बताए ।

भेटमा माओवादी केन्द्रका नेता नारायणकाजी श्रेष्ठ पनि सहभागी भएका थिए । उनीहरूबीच समसामयिक राजनीतिक विषयहरूमा करीब डेढ घण्टा कुराकानी भएको सिंहले बताए । 

‘चुनावमा गठबन्धन गर्दा सबैलाई फाइदा हुन्छ । गठबन्धन गरेरै जानुपर्छ । त्यसबारे छलफल पनि भइरहेको छ,’ प्रचण्डको शेखरलाई गरेको आग्रह उदृत गर्दै सिंहले भने, ‘तपाईं निर्णय गर्ने ठाउँमा हुनुहुन्न तर निर्णयलाई प्रभावित गर्ने ठाउँमा हुनुहुन्छ । चुनावी गठबन्धनको विरोध नगरिदिनुस् ।’

कोइरालाले स्थानीय तहको चुनावमा गठबन्धन गर्न नहुने र जनताले कसलाई रोज्ने भन्ने स्वतन्त्र अधिकार दिनुपर्ने बताएका सिंहले जानकारी दिए । ‘गठबन्धन नगरी चुनावमा जानुपर्छ । त्यसो हुँदा कुन पार्टीको शक्ति कति रहेछ भन्ने पनि थाहा हुन्छ । गठबन्धन भयो भने पनि त्यसलाई हामी मान्दैनौं भन्ने जवाफ शेखर कोइरालाले दिनुभएको छ,’ सिंहले भने ।

माओवादी केन्द्रसँग चुनावी गठबन्धन गर्दा कांग्रेसलाई फाइदा नहुने अघिल्लो चुनावकै सिकाइ भएको कोइरालाले बताएका थिए । 

माओवादी कार्यकर्ताले कांग्रेसलाई भोट नहाल्ने बरु एमालेलाई भोट दिने भएकाले स्थानीय तहमा चुनावी गठबन्धन प्रभावकारी नहुने कोइरालाको भनाई थियो । 

नेता कोइरालाले एमसीसी संसद्बाट अनुमोदन गर्ने विषयले राष्ट्रिय राजनीति नै प्रभावित र विभाजित भएको भन्दै त्यसलाई छिटो टुंगोमा पुर्‍याउन आग्रह गरेका सिंहले बताए । 

जवाफमा प्रचण्डले चुनाव अगाडि एमसीसी पास गर्न नसकिने तर्क राखेको सिंहले जानकारी दिए । 

‘चुनावअघि एमसीसी पास गर्न सकिँदैन । मैले प्रधानमन्त्रीजीसँग अनुरोध गरिरहेको छु, यसलाई अझै समय लिएर छलफल गरेर मात्रै टुंगोमा पुर्‍याउन सकिन्छ भन्नुभएको छ,’ प्रचण्डको भनाई उदृत गर्दै सिंहले भने ।