नेकपा एमालेका उपाध्यक्ष तथा पूर्व अर्थमन्त्री विष्णु पौडेलले सरकार पर्दा पछाडिबाट अझै स्थानीय तहको निर्वाचन रोक्ने षडयन्त्रमा लागेको आरोप लगाएका छन् । 

एमाले र जनताको दबाब थेग्न नसकेर चुनाव घोषणा गरे पनि सत्तारुढ गठबन्धनले चुनाव नचाहेको उनले बताए ।

नेकपा एमाले रुपन्देहीले सोमवार रोहिणी गाउँपालिकाको धकधईमा आयोजना गरेको पार्टी प्रवेश कार्यक्रमलाई सम्बोधन गर्दै नेता पौडेलले आगामी वैशाख ३० गते सरकारले घोषणा गरेको चुनाव रोक्ने बहाना एमालेले पूरा हुन नदिने बताए ।

उनले भने, ‘चौतर्फी दबाबका कारण सत्तारुढ गठबन्धनले चुनाव घोषणा गरे पनि पराजित हुने डरले चुनाव हुन नदिने बहानामा लागेका छन्, त्यसलाई एमालेले सफल हुन दिँदैन ।’ 

तत्कालीन प्रधानमन्त्री केपी शर्मा ओली नेतृत्वको सरकारलाई अदालतको परमादेशबाट हटाएर गठबन्धन सरकार बनाइए पनि वर्तमान सरकार पूर्ण रूपमा असफल भएको उनले दाबी गरे । वर्तमान सरकारले केही पनि गर्न नसक्ने पौडेलको भनाइ थियो ।

पौडेलले रुपन्देहीको विकासको जिम्मा एमालेले लिने बताए । एमाले प्रवेश गर्ने गाउँपालिका अध्यक्ष उपाध्यक्ष, वडाध्यक्षसहित सबैलाई पौडेलले सही समयमा सही पार्टी रोजेको बताए ।

रुपन्देहीका तराई क्षेत्रका पालिकाको विकासका लागि आफूले विगतदेखि नै योजनाहरू ल्याएको भन्दै नेता पौडेलले आगामी दिनमा अझै व्यापक बनाउने बताए । 

पौडेलले अबको निर्वाचन एमालेले एक्लैले जित्ने बताए । जतिसुकै राजनीतिक दल मिलेर आए पनि एमाले एक्लैले सबैलाई पराजित गर्ने दाबी गरे । 

कार्यक्रममा एमाले सचिव छविलाल विश्वकर्माले देशभर एमालेप्रति जनलहर बढ्दै गएको बताए ।