प्रथम बागमती प्रदेश खेलकुद प्रतियोगिताअन्तर्गत पुरुष फुटबलको फाइनल खेलमा ललितपुरलाई स्तब्ध पार्दै मकवानपुर च्याम्पियन बनेको छ । 

हेटौंडा-५ स्थित पिप्ले क्याम्प रंगशालामा आज भएको फाइनल खेलको पहिलो हाफकै शुरुवाती ४ मिनेटमा ललितपुरका लागि बिक्की महर्जनले गोल गर्दै  १-० को अग्रता दिलाएका थिए । 

तर, त्यो अग्रता भने धेरै बेर टिक्न पाएन । विपक्षी टिमको कमजोर डिफेन्सको फाइदा उठाउँदै मकवानपुरका लागि ७ मिनेटमै ललित चौलागाईंले गोल फर्काउँदै खेल बराबरीमा ल्याए । 

यस्तै खेलको पहिलो हाफको ३६ औं मिनेटमा मकवानपुरका समिरराज थोकरले थप १ गोल गर्दै  २-१ गोलको अग्रता बनाए । 

दोस्रो हाफको ६४ मिनेटमा  ललितपुरका लागि रोहित गिरीले  १ गोल गर्दै  खेल बराबरीमा ल्याएका थिए । 

निर्धारित समयमा पनि दुवै टिमले स्पष्ट नतिजा निकाल्न नसकेपछि खेल टाइब्रेकरमा धकेलिएको थियो । 

टाइब्रेकरमा ललितपुरले कुनै पनि गोल गर्न सकेन । मकवानपुरले ३-० को गोल अन्तरले आफ्नो जित सुनिश्चित गर्‍यो । 

खेलको  म्यान अफ दी म्याच मकवानपुरका गोल रक्षक अनिस देउडा घोषित भए । 

विजेता मकवानपुरले नगद १ लाख रूपैयाँसहित शिल्ड ,मेडल र प्रमाणपत्र प्राप्त गरेको छ । उपविजेता ललितपुरले नगद ८० हजारसहित शिल्ड , मेडल र प्रमाणपत्र प्राप्त गर्‍यो ।

त्यस्तै  प्रतियोगिताकै बेस्ट प्लेयर अफ टुर्नामेन्टको रुपमा  मकवानपुरका खेलाडी  समिरराज थोकर घोषित भए । उनले नगद १० हजारसहित ट्रफी प्राप्त गरे ।