३१ असार २०८३, बुधबार
युक्रेनमाथि रुसले आक्रमण गरेपछि रुसका राष्ट्रपति भ्लादिमिर पुटिनको समर्थन सूचकांक १० प्रतिशतले बढेको रुसको स्वतन्त्र सर्वेक्षण संस्था लेवादा सेन्टरको आँकडाले देखाएको छ ।
सर्वेक्षणमा सहभागी भएकामध्ये कुल ८३ प्रतिशत रुसीहरूले युक्रेनमा पुटिनको कारवाहीलाई समर्थन गरेका छन् । फेब्रुअरी महिनामा ७१ र जनवरी महिनामा ६९ प्रतिशत रुसीले पुटिनको समर्थन गरेका छन् ।
युद्धको बेलामा जनताले आफ्नो नेताको साथ दिने गरेकाले यस्तो परिणाम आएको हुन सक्ने विज्ञहरूले बताएका छन् ।
त्यसमाथि रुसले युद्धविरोधी आवाजलाई दमन गरेकाले पनि सर्वेक्षणमा सहभागी भएकाहरूले आफ्नो सही धारणा प्रस्तुत नगरेको हुन सक्ने उनीहरूको भनाइ छ । रुसमा सेनाका विरुद्ध भ्रमपूर्ण खबर फैलाउन नपाइने कानून ल्याइएको छ । युद्धको विरोध गर्ने हजारौंलाई थुनामा राखिएको छ ।
पुटिनको समर्थन सूचकांकमा देखिएको वृद्धि सन् २०१४ कै जस्तो छ । त्यतिखेर रुसले युक्रेनबाट क्राइमिया हात पारेको थियो ।
