मेलम्ची खानेपानी आयोजनाको औपचारिक उद्घाटन मंगलवार हुने भएको छ ।

मंगलवार सुन्दरीजलमा पूर्व प्रधानमन्त्री स्व. कृष्णप्रसाद भट्टराईको सालिक अनावरणसँगै प्रधानमन्त्री शेरबहादुर देउवाले मेलम्ची खानेपानी आयोजनाको औपचारिक उद्घाटन गर्नेछन् ।

खानेपानीमन्त्री उमाकान्त चौधरीले खानेपानी आयोजनाको सम्पूर्ण सफाइ पूरा भएको र चैत २९ गते मंगलवार प्रधानमन्त्रीबाट उद्घाटन हुने जानकारी दिए ।

उनले उपत्यकावासीलाई मेलम्चीको पानी सहज वितरण गर्न सम्पूर्ण तयारी पूरा भएको समेत जानकारी दिए । मेलम्ची खानेपानी आयोजना काठमाडौं ल्याउने परिकल्पना तथा घोषणा पूर्व प्रधानमन्त्री भट्टराईले गरेका थिए ।

उपत्यकावासीलाई भविष्यमा पानीको अभाव नहोस् भन्दै स्व. भट्टराईले २०५१ सालको संसदीय निर्वाचनमा आफ्नो प्रतिबद्धता पत्रमा मेलम्चीको पानी काठमाडौं ल्याउने उल्लेख गरेका थिए ।

यसैको स्मरण गर्दै नेपाल सरकारले सुन्दरीजल स्थित प्रशोधन केन्द्र परिसरमा स्व. भट्टराईको सालिक स्थापना गर्ने भएको हो । सन् २००७ देखि निर्माण शुरू भएको मेलम्ची खानेपानी आयोजना गत असार १ र साउन १७ गते आएको बाढीले ठूलो क्षति पुर्‍याएको थियो ।

लामो समयदेखि मेलम्चीको पानी आउने आशमा रहेका उपत्यकावासी बाढीका कारण आयोजना नै क्षतिग्रस्त बनेपछि निराश बनेका थिए ।

प्रधानमन्त्री शेरबहादुर देउवाले क्षतिग्रस्त आयोजना सफाइ तथा मर्मत चैत मसान्तभित्र मेलम्ची खानेपानी सञ्चालन गर्न खानेपानीमन्त्री उमाकान्त चौधरीलाई निर्देशन दिएका थिए । मन्त्री चौधरीले समय सीमाभित्र नै काम सम्पन्न गर्न कार्ययोजना तथा नियमित निरीक्षण तथा निगरानीसहित काम अघि बढाएका थिए । गोरखापत्रमा खबर छ ।