मेलम्ची खानेपानी आयोजनाको मुख्य सुरुङमा पानी पठाइएको छ । 

खानेपानी मन्त्री उमाकान्त चौधरीले मेलम्चीको अम्बाथान पुगेर मेलम्ची खोलाको पानी आयोजनाको मुख्य सुरुङमा पथान्तरण गरेका हुन् ।

अहिले प्रतिसेकेण्ड २६५ लिटरका दरले पानी सुरुङमा पठाइएको मेलम्ची खानेपानी आयोजनाले बताएको छ । 

गत असारमा आएको बाढीले मेलम्ची खानेपानी आयोजनाको सुरुङमा क्षति पुगेपछि मेलम्चीको पानी काठमाडौं आउनेक्रम बन्द भएको थियो । 

सुरुङभित्र बाढी पसेर लेदो जमेको थियो भने मुहान बाढीले पुरेको थियो ।

मुहान नै मेलम्चीको बाढीले पुरेपछि उक्त आयोजनाबाट पानी काठमाडौं ल्याउन सकिने वा नसकिने भन्नेबारे अन्योल थियो । 

सरकारले चैत मसान्तभित्र काठमाडौंवासीलाई पानी वितरण गर्ने योजनासहित सुरुङ सफा गर्न थालेको थियो । तर, सरकारले पानी वितरण गर्ने भनेको समयमा सुरुङ परीक्षणका लागि पानी पठाएको छ । 

अब वैशाखको दोस्रो साताबाट मेलम्चीको पानी काठमाडौंमा वितरण हुने मेलम्ची खानेपानी आयोजनाले बताएको छ ।