२८ जेठ २०८३, बिहीबार
स्थानीय तह चुनावमा सहकार्यको प्रस्ताव लिएर राप्रपा नेपालका अध्यक्ष कमल थापा एमाले पार्टी कार्यालयमा पुगेका छन् । थापाले स्थानीय तहको चुनावमा सूर्य चिह्नबाट चुनाव लड्ने संकेत गरेका थिए ।
स्थानीय तह चुनावमा तालमेलको विषयमा छलफल गर्न अध्यक्ष थापा एमाले पार्टी कार्यालयमा गएको केन्द्रीय सदस्य पुरु दाहालले जानकारी दिए । एमालेका दोस्रो तहका नेताहरूसँग थापाले छलफल गर्ने भएका छन् ।
‘चुनावी तालमेलबारे पहिलादेखि नै छलफल भएको थियो, सम्भवतः आज औपचारिक सम्झौता हुन सक्छ,’ दाहालले भने । राप्रपा महाधिवेशनमा पराजित भएलगत्तै कमल थापाले राप्रपा नेपाल गठन गरेका थिए ।
२०७२ सालमा बसेको केपी ओली नेतृत्वको सरकारमा कमल थापा उपप्रधानमन्त्री थिए । बुधवार विराटनगर पुगेका एमाले अध्यक्ष ओलीले पनि राप्रपा नेपालसँग तालमेलको सम्भावना रहेको बताएका थिए ।
