२९ असार २०८३, सोमबार
युक्रेनको मरिउपोलमा रुसी सैनिकहरूसमक्ष आत्मसमर्पण गरेका बेलायती सैनिक आइडन आस्लिनसँग मानवीय व्यवहार गर्न उनको परिवारले रुसलाई अनुरोध गरेको छ ।
आस्लिनकी आमा एम्मा भार्डीले भनिन्, ‘उसले मलाई फोन गर्यो अनि लड्नका लागि हतियार बाँकी छैन भन्यो ।’ आफूले रुसी सेनासमक्ष आत्मसमर्पण गर्नुको विकल्प नरहेको आस्लिनले बताएको जानकारी भार्डीले दिइन् ।
आस्लिन नटिंघमशायरको न्युआर्क निवासी हुन् । उनी सन् २०१८ मा युक्रेन गएका थिए र त्यहाँको सेनाका मरिन हुन् ।
मरिउपोलको प्रतिरक्षाका लागि उनी खटिएका छन् । उक्त शहरमा रुसी सैनिकहरूले निकै धेरै बमवर्षा गरेका छन् । शहर लगभग पूरै ध्वस्त छ ।
आस्लिनले सामाजिक सञ्जालमा लेखे, ‘४८ दिन बितेको छ । हामीले मरिउपोल प्रतिरक्षा गर्नका लागि भरमग्दूर कोशिश गरेका थियौं । तर रुसी सैनिकसमक्ष आत्मसमर्पण गर्नुको विकल्प मात्र बाँकी छ । हामीसँग खाना र हातहतियार दुवै छैन ।’
यस्तो बेलामा आस्लिनको परिवारका सदस्यले रुसी अधिकारीहरूलाई दयामाया देखाउन आह्वान गरेका छन् । तर रुसका राष्ट्रपति भ्लादिमिर पुटिनले डोनबास क्षेत्रमा लडाइँ गरिरहेका विदेशी सैनिकहरूलाई युद्धबन्दीको अधिकार प्राप्त नहुने चेतावनी दिएकाले आस्लिनको भविष्य सुखद देखिँदैन ।
