पूर्वप्रधानमन्त्री एवम् नेकपा एमालेका अध्यक्ष केपी शर्मा ओलीले आज मुलुकको विकासको काममा अल्पविराम लागेको भन्दै चिन्ता व्यक्त गरेका छन् ।

गणतन्त्र दिवसको अवसरमा शुभकामना सन्देशमार्फत ओलीले यस्तो चिन्ता देखाएका हुन् । 

‘जनताको बलिदानीपूर्ण संघर्षले स्थापित भएको लोकतान्त्रिक गणतन्त्रमाथि आज संविधानले परिभाषित गरेका राज्यका अंगहरूलाई दुरुपयोग गरी संविधान र प्रणालीको अतिरिक्त व्याख्या रअपव्याख्याद्वारा प्रहार गर्ने काम भइरहेको छ । यसले मुलुकको दूरगामी यात्रालाई अल्मल्याउँदै संविधान र संवैधानिक संस्थाहरुप्रतिको जनताको आस्थामाथि समेत चोट पुर्‍यायो । फलस्वरुप आज मुलुकको विकासका सम्पूर्ण कामहरुमा अल्पविराम लागेका छन्,’ शुभकामना सन्देशमा ओलीले भनेका छन् ।

उनले केही वर्षयता शुरू भएको विकासको राष्ट्रिय बहसको ठाउँ सत्ताशक्तिको अनुचित भागबण्डा, लेनदेन र राज्यस्रोतको दोहनले लिएको समेत बताएका छन् । 

अध्यक्ष ओलीले जनादेशद्वारा स्थापित आफूहरूको नेतृत्वमा युगान्तकारी कामहरूले गणतन्त्रात्मक शासन व्यवस्थालाई सुदृढ गर्न महत्वपूर्ण भूमिका निर्वाह गरेको समेत बताएका छन् । 

उनले शुभकामना सन्देशमा भनेका छन्,‘हामी राष्ट्रको यस आकाङ्क्षालाई पूरा गरेर लोकतान्त्रिक गणतन्त्रलाई जनअनुभूतिबाट प्रमाणित गर्न चाहन्छौं । जनविरोधी शक्तिहरुका अनुचित दुष्प्रयासहरुले अवरोध पुर्‍याएर थाती रहन पुगेका राष्ट्रिय समृद्धिका पाइलाहरुलाई उचाईमा पुर्‍याउने नेकपा (एमाले)को यस अभियानमा सम्पूर्ण पेशा, क्षेत्र, वर्ग र समुदायका दिदीबहिनी दाजुभाइहरुको साथ रहनेछ भन्ने मैले अपेक्षा गरेको छ ।’