०२ साउन २०८३, शनिबार
सरकारले संसदमा पेश गरेको आगामी आर्थिक वर्षको बजेट सकारात्मक रहेको निजी क्षेत्रका उद्योगी व्यवसायीहरूले बताएका छन् ।
नेपाल उद्योग वाणिज्य महासंघका अध्यक्ष शेखर गोल्छाले निजी क्षेत्रले उठाउँदै आएको विषय बजेटमा समेटिएको बताए । ‘उद्योग क्षेत्रको समस्यालाई मसिनो गरी अर्थमन्त्रीले समेटेका छन् । निर्यात बढाउने कुरा सकारात्मक छ,’ गोल्छाले भने ।
विदेशीलाई नेपालमा अपार्टमेन्ट किन्न दिने व्यवस्था सम्बोधन भएकोमा गोल्छाले सन्तुष्टि व्यक्त गरे । बजेटले १०० युनिटका अपार्टमेन्टमा २० प्रतिशत युनिट विदेशीलाई विदेशी मुद्रामा नै बिक्री गर्न सक्ने गरी कानूनी व्यवस्था गर्ने उल्लेख छ ।
त्यसै गरी नेपाल चेम्बर अफ कमर्सका अध्यक्ष राजेन्द्र मल्लले पनि निजी क्षेत्रले दिएको सुझाव बजेटमा समेटिएको बताए । ‘करको दायरा बढाउने कुरा उल्लेख भएको छ । कर राजश्व क्षेत्रमा राम्रो सुधारको संकेत बजेटमा उल्लेख भएको छ,’ मल्लले भने ।
बजेटको आकार ठूलो भएको तर, बीचमा घटाउन नहुने उनले बताए । बजेट कार्यान्वयन चुनौतीपूर्ण रहेकाले सरकारले त्यसमा ध्यान दिनुपर्ने मल्लको भनाइ छ ।
नेपाल उद्योग वाणिज्य महासंघकी निवर्तमान अध्यक्ष भवानी राणाले पनि बजेटमा निजी क्षेत्रले उठाएको कुरा समेटिएको बताइन् । ‘जग्गाको हदबन्दीको कुरा सम्बोधन भएको छ । विदेशीले पनि अपार्टमेन्ट किन्न पाउने राम्रो व्यवस्था हो । फलाम, डण्डी, फुटवेयरको निर्यात गर्दा ८ प्रतिशत अनुदान दिने व्यवस्था राम्रो छ,’ राणाले भनिन् ।
त्यसै गरी, स्वदेशी उद्योगलाई प्रोत्साहन गर्ने कुरा राम्रो भएको, कोभिडमा अप्ठ्यारोमा परेका उद्योग र सेवा क्षेत्रलाई सहुलियत दिने कुरा नदेखिएको उनले बताइन् ।
अहिलेको बजेटलाई लागू गर्दा अर्थतन्त्र सुधारमा योगदान पुग्ने राणाको भनाइ छ ।
