रहेनन् बलिउडका प्रसिद्ध गायक केके, अचानक स्टेजमै ढलेका थिए

बलिउडका चर्चित गायक केकेको आकस्मिक निधनले बलिउड जगतसहित करोडौं फ्यान शोकमा छन् । केकेको आकस्मिक मृत्यु अस्वाभाविक भएको आशंका गरिएको छ । तर, पोष्टमार्टमको रिपोर्ट भने आइसकेको छैन । पोष्टमार्टम रिपोर्ट आएपछि मृत्युको वास्तविक कारण खुल्ने छ ।

मंगलवार साँझ कोलकातामा एक लाइभ कन्सर्टको क्रममा उनले स्वास्थ्य बिग्रिएको भनेका थिए, जसको केही समयपछि उनी अचानक स्टेजमा लडे । उनलाई उपचारका लागि अस्पताल लगिएकोमा चिकित्सकले मृत घोषणा गरेका थिए ।

समाचार एजेन्सी एएनआईका अनुसार गायक केकेको मृत्युबारे न्यू मार्केट प्रहरी चौकीमा अप्राकृतिक मृत्युको मुद्दा दर्ता गरिएको छ । परिवारको सहमतिपछि सोधपुछ र पोस्टमार्टम हुनेछ । पोस्टमार्टमको व्यवस्था कोलकाताको एसएसकेएम अस्पतालमा भइरहेको छ । गायक केकेको शवको आज पोष्टमार्टम गरिने बताइएको छ ।

हिन्दुस्तान टाइम्सको रिपोर्ट अनुसार डाक्टरले केकेको आज पोस्टमार्टम गर्ने बताइएको छ ताकि उनको मृत्युको वास्तविक कारण थाहा पाउन सकियोस् । तर, उनको मृत्यु कार्डियक अरेस्टका कारण भएको हुन सक्ने चिकित्सकहरूले बताएका छन् । 

यसैबीच अस्पतालका एक वरिष्ठ अधिकारीले केकेलाई राति १० बजेपछि अस्पताल ल्याइएको र त्यहाँ पुग्दा उनलाई मृत घोषणा गरिएको बताए । यसै क्रममा गायकको परिवार बुधवार कोलकाता पुगेका छन् ।

लाइभ कन्सर्टपछि होटेल पुग्दा उनलाई भारी महशुस भएको थियो, जसपछि उनी अचानक ढलेको भारतीय सञ्चारमाध्यमहरूले जनाएका छन् । 

यद्यपि, धेरै रिपोर्टहरूले केकेले लाइभ कन्सर्टमा नै असहज महसुस गरेको उल्लेख छ । उनले बत्तीको झिलिमिलीबारेमा पनि गुनासो गरेका थिए । उनले कन्सर्टको बीचमा ब्रेक पनि लिएका थिए ।