मुलुकको प्रमुख व्यापारिक केन्द्र बुटवलको मुख्य भागको सडक खण्ड लामो समयदेखि अलपत्र छ । 

अन्तिमपटकका लागि भन्दै थपिएको म्याद सकिन अब पाँच दिन मात्रै बाँकी छ । तर, काम भने झण्डै ८० प्रतिशत बाँकी छ । 

द कञ्चनजङ्घा/बिरुवा जेभीले ठेक्का पाएको उक्त सडक अन्तिमपटकका लागि भन्दै थपिएको म्याद पनि असार ३० गते सकिँदैछ ।

ठेक्का शुरु भएलगत्तै अदालतमा मुद्दा परेर दुई वर्ष जति काम रोकिएको थियो । त्यसको केही समयपछि कोरोना कहरले काममा केही ढिलाइ भयो । तर, निर्माणको जिम्मा पाएको कञ्चनजंघा/बिरुवा जेभीले त्यसयताका सहज परिस्थितिमा पनि काम गरेन । कागजी प्रक्रिया पूरा गरेजसरी काम गर्दा दोस्रोपटक थपिएको म्यादमा पनि काम पूरा भएन । 

ढिलासुस्ती गर्ने ठेकेदार कम्पनीलाई अहिले फेरि ठेक्काको एक वर्ष म्याद थप्न मिल्ने गरी सार्वजनिक खरिद ऐन संशोधन भएको छ । केही दिनअघि मात्रै आएको सार्वजनिक खरिद ऐनको १२ औं संशोधनमा गरिएको व्यवस्थाअनुसार ठेकेदारलाई अझै एक वर्ष म्याद थप्न मिल्ने छ ।

तर, त्यसका लागि ठेकेदारले भने जायज कारण खुलाएर निवेदन दिनुपर्ने हुन्छ र सोको अध्ययनपछि ३० दिनभित्रमा म्याद थप हुनेछ । 

निवेदनसँगै ६–६ महिनामा गरिसक्ने कामको सूचीसहितको प्रतिबद्धता पनि जनाउनुपर्ने छ । सोही प्रतिबद्धताअनुसार काम नभएमा बल्ल त्यसपछि कारबाहीको प्रक्रिया अगाडि बढाइने आयोजनाका कार्यालय प्रमुख दीपक झाले बताए । दुई वर्षअघि नै सकिनुपर्ने काम २०७९ असार मसान्तसम्मका लागि म्याद थप भएको थियो । 

बुटवलको राजमार्ग चौराहादेखि चिडिया खोलासम्मको साढे तीन किलोमिटरको ६ लेन सडक विस्तारको काम ठेकेदारको चरम लापरवाहीकै कारण पटकपटक म्याद थप्दा पनि पूरा भएको छैन । 

बुटवल–बेलहिया व्यापारिक मार्ग विस्तार आयोजनाअन्तर्गत साढे ३ किलोमिटर सडक ३० महिनामा पूरा गर्ने गरी २०७३ चैत १२ मा सम्झौता भएको थियो ।

तर, सडकको भौतिक प्रगति हालसम्म करीब २६ प्रतिशत मात्रै छ । २०७६ असोजमा पूरा गर्ने गरी सम्झौता भएकोमा सडकको ८२ फुट क्षेत्रभित्र घर परेका घरधनीले अदालतमा मुद्दा हालेपछि २ वर्ष काम रोकिएको थियो ।

२०७५ वैशाख १२ गते अदालतको आदेशले सडक निर्माणको बाटो खुलेपछि २०७७ जेठमा पूरा गर्ने गरी पहिलोपटक म्याद थप भएको थियो । तर, निर्माण कम्पनीले काम गर्न नपाएको भनेर म्याद थप्न निवेदन दियो । निवेदनअनुसारै दोस्रो पटक म्याद थप भयो । 

२०७७ पुस १० गते मन्त्रिपरिषद् बैठकले २०७९ असार मसान्तसम्मका लागि म्याद थप गरेको थियो । व्यापारिक मार्ग विस्तार आयोजनाका प्रमुख झाले कार्यालय र सरोकारवालाको तर्फबाट समन्वय र सहजीकरण भए पनि निर्माण कम्पनीले राम्रोसँग कामै नगरेको भन्दै बताए । 

एउटै आयोजनामा एउटै ठेकेदारलाई बारम्बार ताकेता गर्ने, प्रतिबद्धता पत्रमा हस्ताक्षर गराउने, प्रशासनमा उपस्थित गराउनेसम्मका काम गरिए पनि सडकको काम भने नभएको उनको भनाइ छ । 

ठेकेदार र कम्पनीका प्रतिनिधिहरूसँग कैयौँपटक छलफल भयो । सरोकारवालाहरू समेतको उपस्थितिमा पटकपटक ताकेता पनि गरिएको थियो । 

सोही क्रममा २०७८ असार १८ गते तत्कालीन प्रमुख जिल्ला अधिकारी आस्मान तामाङ र जिल्ला प्रहरी प्रमुखलगायतको रोहवरमा ठेकेदार सुवित श्रेष्ठले २०७९ असार मसान्तसम्म काम सक्ने लिखित प्रतिबद्धता जनाएका थिए ।