काठमाडौं उपत्यकाकाको फोहर व्यवस्थापनको काम फेरि रोकिएको छ । फोहर व्यवस्थापन गरिदै आएको नुवाकोटको सिसडोलदेखि बञ्चरेडाँडासम्म जाने बाटो मर्मतको काम भइरहेकाले बिहीवारदेखि फोहर व्यवस्थापनको काम रोकिएको हो । 

हाल काठमाडौं उपत्यकाको फोहर बञ्चरे डाँडामा व्यवस्थापन गरिदै आएको छ । सिसडोलबाट बञ्चरेडाँडा जाने २ किलोमिटर बाटो मर्मतको काम थालिएकाले फोहर उठाउन रोकिएको काठमाडौं महानगरपालिकाले जनाएको छ । उक्त बाटो मर्मतको काम करिब एक हप्ता लाग्ने अनुमान गरिएको छ । सो अवधिभर काठमाडौं उपत्यकाको फोहर नठाइने काठमाडौं महानगरपालिका वातावरण शाखाकी प्रमुख सरिता राईले बताइन् । 

शहरी विकास मन्त्रालयले फोहरको गाडी आवतजावत गर्दा बाटो मर्मतको काममा समस्या आएको भन्दै काठमाडौं महानगरपालिकालाई केही दिन फोहर ढुवानीका गाडी नचलाइदिन आग्रह गरेको थियो । सोही आग्रहअनुसार महानगरपालिकाले फोहर व्यवस्थापन कार्य रोकेको उनले बताइन् । 

काठमाडौं महानगरपालिकाले फोहर व्यवस्थापनको काम नहुन्जेलसम्म आ–आफ्नो घर पसल व्यवसायबाट उत्पन्न हुने कुहिने र नकुहिने फोहोरलाई सडक, चोक, सार्वजनिकस्थलमा नफाली घरभित्रै छुट्टाछुट्टै राख्न अपिल गरेको छ । एक सार्वजनिक सूचना जारी गर्दै महागरपालिकाले बाटो मर्मतको काम सकिने वित्तिकै फोहर व्यवस्थापनको कार्य नियमित रूपमा गरिने बताएको छ । 

काठमाडौं उपत्यकाका १८ वटा स्थानीय तहको फोहर बञ्चरे डाँडामा व्यवस्थापन गरिदै आएको छ । हरेक दिन काठमाडौं उपत्यकाबाट एक हजार २०० मेट्रिकटन फोहोर सिसडोलमा व्यवस्थापन हुँदै आएको छ । यसमध्ये सबैभन्दा बढी काठमाडौं महानगरपालिकाबाट ५०० मेट्रिकटन फोहर निस्किने बताइन्छ ।