ऊर्जा जलस्रोत तथा सिँचाईमन्त्री पम्फा भुसालले विद्युत् उत्पादन गर्ने अनुमति–पत्र (लाइसेन्स) लिएर काम नगर्ने कम्पनीसँगको खरिद सम्झौता (पीपीए) खोरज गरिने बताएकी छन् । 

आइतवार नेपाल आर्थिक पत्रकार समाज (सेजन)ले गरेको परामर्श कार्यशालामा उनले सरकार लाइसेन्स लिएर विद्युत् उत्पादन नगर्ने कम्पनीको पीपीए खारेज गर्ने तयारीमा रहेको जानकारी दिएकी हुन् । पछिल्लो समय सरकारसँग ‘टेक एण्ड पे’ प्रावधानमा पीपीए गरेका करिब १६ सय मेगावाट जलविद्युत् आयोजनाहरूले काम अघि नबढेकाे उनको भनाइ छ । उनले ति कम्पनीहरूको पीपीए खारेज गरिने बताइन् । 

उनले जलविद्युत् आयोजनाको निर्माण कार्य नगर्ने तर खोला–नदी ओगटेर बस्ने प्रविधिको अन्त्य गरिने बताइन् । वास्तविक विद्युत् उत्पादन कम्पनीहरुलाई प्रोत्साहन गर्न यस्तो गर्न लागिएको उनको दाबी छ । 

मन्त्री भुसालले टेक एण्ड पेमा आधारित विद्युत् खरिद सम्झौता भएकाले उत्पादन भएको विद्युत बिक्री गर्न नसके ठूलो मात्रामा वित्तीय जोखिम बढ्ने बताइन् । उनले नेपालको विद्युत् प्रशारण लाइन र बजार जोखिम दुवैको मूल्यांकन एवं विश्लेषण गर्नु आवश्यक भएको बताइन् । उनले विद्युत्् प्राधिकरणले विद्युत् खरिद सम्झौता गरेका करिब ३ हजार २ सय मेगावाटका आयोजनाहरू निर्माणाधीन अवस्थामा रहेको बताइन् । 

उनले अन्तरदशीय विद्युत् व्यापार विभिन्न चुनौती बीच सकारात्मक दिशामा अगाडि बढेको दाबी गरेकी छन् । भारतसँग थप विद्युत् व्यापार गर्नको लागि आवश्यक कूटनितिक र राजनीतिक छलफल जारी रहेको जानकारी दिइन् ।