बागमती प्रदेशका मुख्यमन्त्री राजेन्द्र पाण्डेले मुलुकको पर्यटन प्रवद्र्धनमा होटल व्यवसायीको महत्वपूर्ण योगदान रहेको बताएका छन् । नेपाली होटल व्यवसायी सङ्घको २०औँ वार्षिक साधारणसभा एवं १२औँ अधिवेशनको आज उद्घाटन गर्दै उनले आन्तरिक एवं बाह्य पर्यटन प्रवद्र्धनमा होटल व्यवसायीको महत्वपूर्ण योगदान रहेको बताए । 

“मुलुकको अर्थतन्त्रको मेरुदण्डको रुपमा रहेको पर्यटन क्षेत्रको विकासका लागि गुणस्तरीय सेवा प्रदान गर्नुपर्छ”, उनले भने । नेपालमा पर्यटन क्षेत्रको अथाह सम्भावना रहेकाले यसको विकासका लागि सबै लाग्नुपर्ने उनको भनाइ थियो । मुख्यमन्त्री पाण्डेले पर्यटनमैत्री प्रदेश निर्माणमा बागमती प्रदेश लागेको बताउँदै पर्यटन ऐनमा देखिएका समस्या समाधान गर्न प्रदेश सरकारले काम गर्ने विश्वास व्यक्त गरे । 

काठमाडौँ महानगरपालिका–२६ का वडाध्यक्ष ख्यामराज तिवारीले होटल क्षेत्र व्यवसायमात्र नभई सेवाको क्षेत्र भएकाले व्यवस्थित र मर्यादित ढङ्गले व्यवसाय गर्न आग्रह गरे । 

टोखा नगरपालिका–९ का वडाध्यक्ष रामभक्त घिमिरेले होटल व्यवसायलाई मर्यादित र कानुनअनुसार सञ्चालन गर्न आग्रह गर्नुभयो । उहाँले सबै होटल सङ्घका समस्या साझा भएकाले एउटै होटल सङ्घ बनाएर अगाडि बढ्न व्यवसायीलाई आग्रह गर्नुभयो ।

नेपाल यातायात व्यवसायी राष्ट्रिय महासङ्घका अध्यक्ष विजयबहादुर स्वाँरले निजी क्षेत्रको लगानी सुरक्षा गर्नका लागि सरकार लाग्नुपर्ने बताए । 

नेपाल पर्यटन बोर्डका उपाध्यक्ष चन्द्र रिजाल, काठमाडौँ होटल व्यवसायी सङ्घका अध्यक्ष पदम लिम्बु, जिल्ला होटल व्यवसाय सङ्घ काठमाडौँका कार्यवाहक अध्यक्ष सुरेश बराल, समाज उत्थान महिला मञ्चकी उपाध्यक्ष जानुका नेपाललगायतले आन्तरिक तथा बाह्य पर्यटन प्रवद्र्धनको महत्वपूर्ण क्षेत्र होटल व्यवसायलाई राज्यले महत्व नदिएको गुनासो गरे ।