स्कुल तथा कलेजका विद्यार्थीको सुरक्षालक्षित चेकिङअन्तर्गत सोमवार मादक पदार्थ सेवन गरी सवारी साधन चलाउँदै गरेका १ जना विद्यार्थीसहित ५१ जना चालकलाई ट्राफिक प्रहरीले कारबाही गरेको छ ।

काठमाडौं उपत्यकाका विभिन्न स्थानमा सोमवार बिहान गरिएको चेकिङमा सवारी चालक अनुमति पत्र प्राप्त नगरेका २८ जना, कागजपत्र साथमा नभएका २१ जना, ३ जना सवार एउटा सवारीसहित र मादक पदार्थ सेवन गरी सवारी साधन चलाउने १ जना गरी ५१ जना विद्यार्थी चालकलाई कारवाही गरिएको उपत्यका ट्राफिक प्रहरी कार्यालयका प्रवक्ता प्रहरी वरिष्ठ उपरिक्षक राजेन्द्र प्रसाद भट्टले जानकारी दिए । 

उनका अनुसार नयाँबानेश्वको चेल्सी इन्टरनेशनल एकेडेमीमा प्लस टु पढ्दै गरेका २१ वर्षीय एक विद्यार्थी लाई चेकिङ गर्दा मदिरा सेवन गरेर सवारी चलाएको भेटिएको छ । उनले बाग्मति प्रदेश ०२–०२३प ७३ ८६ नम्बरको मोटरसाइकल चलाएको पाइएपछि ट्राफिक प्रहरीले काठमाडौंको दरबारमार्गबाट कारबाही गरेको हो ।

साउन ३० गतेबाट शुरू भएको  कलेजका विद्यार्थी सुरक्षालक्षित चेकिङ अभियानमा हाल सम्म १ हजार ८२ जना विद्यार्थी चालकलाई ट्राफिक प्रहरीले विभिन्न कसूरमा कारबाही गरेको ट्राफिक कार्यालयले जनाएको छ ।