१९ असार २०८३, शुक्रबार
सत्तासाझेदार नेकपा (माओवादी केन्द्र)का सांसद मायाप्रसाद शर्माले डेंगु रोगका संक्रमितहरूलाई औषधि उपचारको आवश्यक व्यवस्था मिलाउन सरकारसँग माग गरेका छन् ।
शुक्रवार राष्ट्रियसभा बैठकमा विशेष समय लिएर बोल्दै सांसद शर्माले डेंगु रोगका संक्रमितहरूको उपचार र महामारीको रुपमा फैलिएको यस रोगको नियन्त्रणमा मेहनत गर्न पनि सरकारको गम्भिर ध्यानाकर्षण गराए । उनले दर्जनौं मानिसहरूको ज्यान लिइसकेको सो रोग नियन्त्रणका लागि सरकारले पहल गर्न ढिलाई गरिरहेको भन्दै आपत्तिसमेत जनाए ।
‘देशका धेरै ठाउँमा बाढी पहिरो गएको छ । दार्चुला बाढी पहिरोको चपेटामा परेको छ । काभ्रेमा बाढी पहिरोले सताइराखेको छ । डेंगु रोग एउटा भयावह स्थितिमा आएको छ । १२ हजारभन्दा बढी मान्छेहरूलाई प्रभावित बनाएको सूचनाहरू दर्जनौं मानिसहरू दिवंगत भएको सूचनाहरू प्राप्त भएका छन्’, सांसद शर्माले भने, ‘यसको उपचारका लागि सरकारले पहल गर्ने कुरामा ढिलाई किन गराएको छ ? यसको सचेत पहल गरोस् । औषधि उपचारको बारेमा सबै पहलकदमी अगाडि बढाउन मेहनत गरोस् । र, नियन्त्रणमा लागि जोड गरोस् । मैले यो कुरा राख्न चाहन्छु ।’
सांसद शर्माले बाढी र पहिरोबाट आहत भएकाहरूलाई तत्काल राहतको व्यवस्था गर्न पनि सरकारलाई सचेत गराए ।
