स्वतन्त्रबाट धरान उपमहानगरपालिकाको मेयर पदमा निर्वाचित भएका हर्क साम्पाङ निर्वाचन आयोगले साढे ५ लाख जरिवाना गरेपछि आक्रोशित बनेका छन् । आयोगले चुनावी खर्च विवरण नबुझाएको भनेर साढे ५ लाख जरिवानाको निर्णय गरेको थियो । 

मंगलबार सामाजिक सञ्जालमार्फत उनले आफ्नो चुनावी खर्च २ लाख पनि नभएको तर दुई दिन ढिला हुँदा जरिवाना चाहिँ किन साढे ५ लाख भन्दै कटाक्ष गरेका छन् । उनले भनेका छन्, ‘दुई दिन ढिलो गरी खर्च विवरण पेश गरेको भनेर निर्वाचन आयोगले ५ लाख ५० हजार जरिवाना गर्नु भनेको लुट्नु हो । मेरो पूरा खर्च नै २ लाख नि थिएन जरिवाना चाहिँ त्यति धेरै ।’
आयोगले उपमहानगरपालिकातर्फ मेयर र उपमेयर पदका २ सय १८ जनालाई जनही साढे ५ लाख रुपैयाँ जरिवाना सुनाएको छ ।