बलिवुडमा ओम राउत निर्देशित ‘आदिपुरुष’ लाई लिएर विवाद बढ्दै गएको छ । अक्टोबर २ मा यस फिल्मको टिजर राम नगरी अयोध्यामा भव्य रुपमा रिलिज गरिएको थियो । तर, टिजरलाई सामाजिक सञ्जालमा मानिसहरूले अस्वीकार गरेका छन् । फिल्मका निर्माता सामाजिक सञ्जालमा ट्रोल भइरहेका छन् । 

‘राम’ बनेका प्रभास र ‘रावण’ बनेका सैफ अली खानको लुक्सलाई दर्शकहरूले मन पराएनन् । यसका साथै टिजरमा धेरै कमीकमजोरीलाई पनि दर्शकले औँल्याएका छन् । यसैबीच रामानन्द सागरको ‘रामायण’ मा ‘राम’को भूमिका निभाएका अरुण गोविलले ‘आदिपुरुष’का निर्माताले धार्मिक भावनामा चोट पुर्‍याएको आरोप लगाएका छन् । 

अरुण गोविलले सामाजिक सञ्जालमा एक भिडियो शेयर गरेका छन् । जसमा उनले ‘आदिपुरुष’को टिजर रिलिज भएदेखि नै चारैतिर हंगामा मच्चिएको बताए । ‘जताततै यसको चर्चा छ । मलाई सयौं फोन आएका छन् । लामो समयदेखि मनमा धेरै कुराहरु खेलिरहेका थिए । ती चीजहरू तपाईंसँग साझेदारी गर्ने समय आएको जस्तो देखिन्छ । ‘रामायण’, ‘महाभारत’ जस्ता सबै पौराणिक ग्रन्थ र शास्त्रहरू हाम्रा सांस्कृतिक र धार्मिक सम्पदा हुन् । यो हाम्रो संस्कृति हो । यो हाम्रो जरा हो । यो सबै मानव सभ्यताको आधार हो । न त जग हल्लाउन सकिन्छ, न जरा बदल्न सकिन्छ, र यो खेल्न वा छेडछाड गर्न ठीक छैन’, उनले भने, ‘हाम्रो संस्कृति संसारको सबैभन्दा पुरानो संस्कृति हो ।’

भिडियोमा अरुण गोविल शास्त्रबाट संस्कार र बाँच्ने आधार पाएको बताउँछन् । ‘यी सम्पदाहरूले हामीलाई बाँच्ने कला सिकाउँछन् । हाम्रो संस्कृति संसारको सबैभन्दा पुरानो संस्कृति हो । यस्तो अवस्थामा यसमा छेडछाड गर्दा धार्मिक भावनामा ठेस पुग्छ । साढे दुई वर्षअघि कोरोना आएपछि हाम्रो धार्मिक आस्था बलियो भएको छ’, उनले भने । 

कोरोनाको बेला फेरि ‘रामायण’को प्रसारण शुरु हुँदा उनले विश्व कीर्तिमान बनाएका थिए । उनले भने, ‘यो हाम्रो मान्यता र परम्पराको ठूलो संकेत हो । हाम्रा युवा पुस्ताले ३५ वर्षअघि बनेको ‘रामायण’ पूर्ण श्रद्धा र विश्वासका साथ हेरे ।’

निर्मातालाई पनि गरे गाली 

अभिनेताले थप भने कि, ‘तपाईंलाई हाम्रो जग, जरा र धार्मिक संस्कृतिमा छेडछाड गर्ने अधिकार छैन । सृजनात्मकताको नाममा धर्मको मजाक बनाउन मिल्दैन । सनातन धर्मको खिल्ली उडाउने, देवीदेवताका आपत्तिजनक पोस्टर लगाउने, गालीगलौज गरेको देखाउने, आखिर अधिकार कसले दियो भन्ने चलन बन्दै गएको छ । स्वतन्त्रताको नाममा धर्मको मजाक नउठाऔँ, कसैको आस्था र परम्परालाई टुक्राएर प्रस्तुत नगर्नुहोस् ।’

भिडियोको अन्त्यमा उनले धार्मिक र ऐतिहासिक सम्पदालाई मान्यता दिएकोमा प्रधानमन्त्री नरेन्द्र मोदीलाई धन्यवाद पनि दिएका छन् ।