नेपाल उद्योग वाणिज्य महासंघका वरिष्ठ उपाध्यक्ष चन्द्रप्रसाद ढकालले नेपालको निजी क्षेत्रसँग सहकार्य गर्दै विदेशमा आर्जन गरेको ज्ञान, सीप र पुँजीलाई नेपाल भित्र्याउन गैर आवासीय नेपालीहरूलाई आग्रह गरेका छन् । 

गैर आवासीय नेपाली संघको वार्षिक साधारण सभाको अवसरमा मंगलवार  राजधानीमा आयोजित एक कार्यक्रमलाई सम्बोधन गर्दै वरिष्ठ उपाध्यक्ष ढकालले नेपालमा लगानीको प्रचुर सम्भावना रहेको र यहाँ लगानीको प्रतिफल पनि अन्य देशमा भन्दा राम्रो रहेको बताए । 

‘नेपालमा लगानीको वातावरण छ । पुराना र जटिल कानूनहरू परिवर्तन भएका छन् । अरु बाँकी कानूनहरू परिवर्तन हुँदैछन् । नेपालमा धेरै सम्भावना छन् । प्रतिफल पनि तपाईंले अन्य देशमा पाउने भन्दा राम्रो छ’, उनले भने । 

गैर आवासीय नेपाली संघले एनआरएन कोष स्थापना गरी ‘कलेक्टिभ’ रूपमा नेपालमा लगानी गर्न शुरु गरेको बताउँदै यसलाई थप प्रभावकारी रूपमा अगाडि बढाउन उनले आग्रह गरे । 

नेपालमा आइपर्ने विभिन्न प्राकृतिक विपत्तिको समयमा गैर आवासीय नेपालीहरूले खेलेको भूमिकाको प्रसंशा गर्दै उनले गैर आवासीय नेपालीहरूले आर्जन गरेको ज्ञान, सीप र पूँजीलाई नेपालमा लगानी गर्न आग्रह गरे । ‘तपाईंहरूले आफू रहेका स्थानमा आर्जन गरेको ज्ञान, सीप र पुँजीलाई नेपालमा लगानी गर्नुहोस्, निजी क्षेत्र त्यसमा सहकार्य गर्न तयार छ’, उनले भने । 

उक्त अवसरमा ढकालले गैर आवसीय नेपालीहरूलाई लक्षित गरी विदेशमा रहेका नेपालीहरूलाई नेपाली बैंकमा विदेशी मुद्रामा खाता खोल्ने सुविधा शुरु भएको जानकारी गराए । उनले विदेशी मुद्रामा खाता खोली नेपालमा देखा परेको विदेशी मुद्रा सञ्चितिको समस्या समाधानमा सहयोग गर्न गैर आवासीय नेपाली संघलाई आग्रहसमेत गरे ।