२४ जेठ २०८३, आइतबार
रुसले युक्रेनमा युद्ध चलाइरहेको भए पनि अमेरिकाका लागि चीन सबभन्दा ठूलो सुरक्षा चुनौती भएको अमेरिकी रक्षा मन्त्रालयको नयाँ रक्षा रणनीतिले उल्लेख गरेको छ ।
अमेरिकी सेनालाई कसरी हातहतियारले सुसज्जित पार्ने र भविष्यका लागि आकार दिने भन्ने कुरा बेइजिङले निर्धारित गर्ने दस्तावेजमा उल्लेख गरिएको छ ।
बिहीवार जारी गरिएको दस्तावेजमा चीनसँगको द्वन्द्व अवश्यम्भावी वा वाञ्छनीय नरहेको उल्लेख छ । चीनले दक्षिण चीन सागरमा आक्रामकता बढाइरहेको र ताइवानमाथि दबाब चर्काएको भन्दै अमेरिकाले बेइजिङको प्रभुत्व रोक्न प्रयास गर्ने बताइएको छ ।
हिन्द–प्रशान्त क्षेत्रमा अमेरिकी साझेदारीलाई अवमूल्यन गर्न चीनले कोशिश गरिरहेको र आफ्ना छिमेकीहरूलाई थर्काइरहेको पेन्टागनको दस्तावेजमा लेखिएको छ ।
कुल ८० पृष्ठको यो दस्तावेजमा मस्को अमेरिका तथा उसका साझेदारका लागि जोखिम भएको पनि उल्लेख छ । आणविक हतियार, साइबर कारवाही तथा लामो दूरीको क्षेप्यास्त्रका कारण रुस खतरनाक प्रतिद्वन्द्वी भएको बताइएको छ ।
चीन र रुसबीचको मित्रता बढिरहँदा अमेरिकाको रक्षा र सुरक्षालाई चुनौती तेर्सिएको दस्तावेजमा लेखिएको छ । आतंकवादी जोखिम पनि कायम रहेको उल्लेख छ ।
रुस र चीनका रूपमा आणविक हतियारयुक्त दुई मुलुकको चुनौती अमेरिकाले बेहोर्नुपरेको पनि प्रतिवेदनमा लेखिएको छ ।
बिहीवार नै क्षेप्यास्त्र रक्षा तथा आणविक हतियारसम्बन्धी थप दुईवटा प्रतिवेदन सार्वजनिक गरिएको छ । आगामी चार वर्षका लागि अमेरिकाको सैन्य योजनाका विषयमा यी दस्तावेजहरूले ब्लुप्रिन्ट उपलब्ध गराएका छन् ।
चीनले अर्थतन्त्रमा आफूलाई उछिन्न लागेको अनि सार्वभौमसत्तालाई पनि दह्रो गरी प्रतिरक्षा गरिरहेकाले उसलाई जोखिमका रूपमा अमेरिकाले चित्रण गरेको विश्लेषकहरूले बताएका छन् ।
