२९ असार २०८३, सोमबार
न्यायको लागि संघर्ष गरिरहेका बताउने ‘कुमारी आमा’ निहारिका राजपूतले शुक्रवार प्रधानमन्त्री निवास बालुवाटारको निषेधित क्षेत्रमा प्रदर्शनको प्रयास गरेकी छन् । काखमा बच्चासमेत लिएर पुगेकी उनले निषेधित क्षेत्रमा प्रदर्शनको प्रयास गरेकी हुन् ।
यद्यपि, प्रहरीले उनलाई नियन्त्रणमा लिएको छ । मोटरसाइकलमा लिफ्ट लिएर बालुवाटार पुगेकी उनले राज्यको अभिभावक प्रधानमन्त्री भएकाले आफू न्याय माग्न आएको बताएकी थिइन् । तर, सुरक्षार्थ खटिएको प्रहरीले उनलाई त्यस क्षेत्रमा प्रदर्शन गर्न नपाउने बताउँदै रोक लगाएको थियो । प्रहरीसँग केहीबेर सवालजवाफ गरेकी उनले घाँटीमा लगाइरहेको सल फ्याँकेकी थिइन् ।
निहारिकाले आफू न्याय माग्न राज्यको अभिभावकसामु आएको बताइन् । त्यसपछि प्रहरीले उनलाई त्यहाँ प्रदर्शन गर्न नपाइने भन्दै भाटभटेनीतिर जान आग्रह गरे । तर, निहारिकाले मानिनन् । त्यसपछि प्रहरीले बच्चासहित उनलाई नियन्त्रणमा लिएको थियो ।
उनले आफ्नो मुद्दाको पेशी चाँडो तोक्नुपर्ने, आफ्नो बच्चो डीएनए रिपोर्ट सार्वजनिक गर्नुपर्ने माग गरिन् ।
उनले यसअघि राष्ट्रपति कार्यालय शितल निवास अगाडि पनि आत्मदाहको प्रयास गरेकी थिइन् । निहारिकाले आफूलाई बलात्कार गरेपछि बच्चा जन्मिएको जिकिर गर्दै कानूनी उपचारका लागि संघर्ष गरिरहेकी छन् ।
